Malešecy (CS/SN). Na posedźenju Malešanskeje gmejnskeje rady zwurazni gmejnski radźićel dr. Jürgen Wengler wutoru swój podhlad, zo bu přirodny pomnik Čertowy kamjeń při Plusnikečanskej skale wobhospodarjerjej Pro Stein předaty. Wšako steja tam nětko tafle „přistup zakazany“. Po jeho wědźenju to jenož hišće z dowolnosću Pro Stein móžno. Wengler na to tuka, zo chcedźa tak njeprošenym wosobam přistup zakazać. Malešanski wjesnjanosta Matthias Seidel (CDU) tomu znapřećiwi, prajo, zo je ležownosć wysoko poćežena a hižo z teje přičiny ju Pro Stein kupiła njeby. Po lěsnym zakonju njeje scyła dowolene tajke tafle nastajeć. Nimo toho ma gmejna předprawo na kup.
Na prašenje dalšeho gmejnskeho radźićela, hač je gmejna na dospołny wupad miliny přihotowana, Seidel zwurazni, zo tomu tak njeje. Wjesnjanostow drje su w tej naležnosći kubłali, ale dotal njeje so nichtó dale wo nju starał.
