W Budyskim wokrjesu su CDU, Lěwica a SPD wolerjow zhubili, Zeleni a FDP přidobyli
Budyšin (SN/at). Při wólbach Europskeho parlamenta je AfD w Budyskim a Zhorjelskim wokrjesu načolnu poziciju, kotruž bě sej strona před lětomaj při wólbach zwjazkoweho sejma zdobyła, wčera ze snadnymi stratami zakitowała. W Budyskim wokrjesu docpě 32,1% (2017: 32,8%) a w Zhorjelskim 32,4% (2017: 32,9%). Zrosćeny zajim wobydlerjow za tute wólby zwurazni so tež w Hornjej Łužicy we wo nimale pjećinu wjetšim wólbnym wobdźělenju porno předchadźacemu wotumej lěta 2014.
Jenož w dźewjeć komunach je so CDU přesadźiła. W Budyskim wokrjesu su to Chrósćicy, hdźež ma z 50 procentami płaćiwych hłosow najlěpši wuslědk, Kulow, Njebjelčicy, Pančicy-Kukow, Ralbicy-Róžant, Worklecy a Šěrachow-Korzym. W Zhorjelskim wokrjesu stej to Wostrowc a Mittelherwigsdorf. W 36 komunach w sakskim dźělu serbskeho sydlenskeho ruma je AfD dobyła. Najwjetši podźěl měješe w Njeswačidle (45,0%), Bóšicach (42,1%) a Bukecach (41,0%).
Po dalšich wuslědkach hłosowachu wobydlerjo w Budyskim wokrjesu za CDU 24,8% (-14%), Lěwicu 10,2% (-7,1%), SPD 6,9% (-6,1%), Zelenych 5,7%, (+2,5%), FDP 4,9% (+2,1) a dalše 15,4% (+1,3%).
