Kancler Merz hrozy Israelej humanitarneje krizy dla z naprawami

Berlin/Gaza (dpa/SN). Hladajo na katastrofalne połoženje w zawrjenym Gazaskim pasmje chce Němska zhromadnje z Jordaniskej ludźi tam z pomocu powětroweho mosta zastarać. Zwjazkowy kancler Friedrich Merz hrozy Israelej runočasnje prěni króć z konkretnymi naprawami, njedyrbjał-li kraj humanitarne połoženje w krizowej kónčinje spěšnje polěpšić. Tež prezident USA Donald Trump swojeho zwjazkarja namołwja, ludnosć w Gazaskim pasmje ze žiwidłami zastarać.

„Chcu, zo so wón wo to postara, zo maja ludźo w Gazy něšto k jědźi“, rjekny Trump na swojim tuchwilnym wopyće w Šotiskej na prašenje nowinarja, kak z israelskim ministerskim prezidentom Benjaminom Netanjahuwom postupuje.

Dźeń a husćišo rozprawjeja medije wo padach z prawicarskim pozadkom. Kajka pak je situacija na sakskich šulach? Přizjewja zamołwići kóždy prawicarski pad šulskemu zarjadej? Wobhladaš-li sej šulsku statistiku tak mjenowanych wosebitych podawkow zašłeho lěta ći napadnje, zo so w kónčinach, kiž su za aktiwnu prawicarsku scenu znate, lědma prawicarske pady jewja. Prawdźepodobnje je šule scyła njepřizjewja, dokelž steja tam prosće na dnjowym porjedźe. To je po mojim měnjenju wopaki. Prawicarske pady njesměmy zamjelčeć, ale dyrbimy wo nich rěčeć, zo bychmy z tym nowym padam zadźěwali. Tež serbska šula we Worklecach prawicarskej padaj ignorowała njeje a je jej LaSuB zdźěliła. Šula stara so wo aktiwnu prewenciju přećiwo prawicarskemu zmyslenju. W tutym zwisku přewjedu tam pedagogiski dźeń w poslednim ty­dźenju prózdnin. Tute postupowanje sej chwalu. Přećiwo prawicarskemu zmyslenju dyrbimy aktiwnje postupować a nic je prosće akceptować! Stella Pilzec

Podstupim (dpa/SN). Stanować při dešćikojtym wjedrje a runje 21 stopnjach celsiusa w lěću? Towaršnosć za turizm a marketing w Braniborskej (TMB) wočakuje, zo sej lubowarjo campinga najebać přerosćene wjedro dowol na stanowanišću skazyć njedadźa. „Kaž zhromadnosć stanowacych posudźuju, so wona wot dešćika zatrašić njeda“, praji rěčnik TMB Patrick Kastner rozhłosownikam sćelaka rbb.

Camping je w Braniborskej derje do sezony startował a wobhospodarjo stanowanišćow zhladuja pozitiwnje na swojich lěćnych hosći w tuchwilnych prózdninach. Hosćo ze susodneju krajow Sakskeje a Saksko-Anhaltskeje, hdźež su so prózdniny hižo prjedy za­počeli, su tež hižo na stanowanišćach pobyli, Kastner rjekny. Tuchwilu je pak hišće přezahe, wliw wjedra na wužiwanje stanowanišćow wuhódnoćić.

Po posudku Patricka Kastnera wšak je w Braniborskej hišće dosć móžnosćow, w hotelach swobodne stwy nańć. Tež přebytk na bydlenskich čołmach hodźi so hišće skazać. Tute njejsu tak jara wot wjedra wotwisne. „Na čołmje při 30 stopnjach tež wjace rjenje njeje.“

Předsydka Zeleneje młodźiny Jette Nietzard znowa za zastojnstwo kandidować njebudźe. Tole je 26lětna w socialnej syći Instagram zdźěliła. Hač k wólbam noweho zwjazkoweho předsydstwa dorostoweje organizacije Zelenych w oktobru w Lipsku pak wostanje wona w zastojnstwje. W swojim přinošku wona skorži, zo njedóstawa dosć podpěry za swoje namjety. Nietzard bě stajnje zaso z politisce prowokantnymi wuprajenjemi napadnyła.

Hnydom dwaj wukazaj zajeća měješe policija w rukomaj, jako na parkowanišću na awtodróze A4 pólskeho šofera wosoboweho awta kontrolowaše. 20lětny njebě pokutu 2 400 eurow jězdźenja pod wliwom alkohola dla zapłaćił. W dalšim padźe běchu jeho zranjenja ćěła dla k pokuće 3 280 eurow zasudźili. Tež ta njebě zapłaćena. Tuž z wukazom zajeća za nim pytachu. 20lětneho dowjezechu do jastwa.