Trump za nowy deal zwólniwy
Washington (dpa/SN). Prezident USA Donald Trump je pod wěstymi wuměnjenjemi zwólniwy, z wikowanskimi partnerami wo wolóženjach nastupajo nowe cła rěčeć, kotrež sej USA wot najnowšeho žadaja. Kónc tydźenja je Trump ze statnikami ze wšeho swěta telefonował, wón žurnalistam w swojim prezidentskim lětadle přeradźi. „Woni napjeće na to čakaja, zo móhli deal z nami wotzamknyć.“ Zdobom Trump rjekny, zo njeje dlěje zwólniwy, wikowanske deficity akceptować, hdyž druhe kraje wjace tworow do USA dowožuja hač tam sami kupuja. Trump kritizuje wosebje Chinu. „Sym zwólniwy, z Pekingom rěčeć. Woni pak dyrbja nadbytk wottwarić.“
Tež europskim statam njeje prezident USA dobry, dokelž maja tohorunja wikowanski nadbytk. Europa z USA „jara špatnje wobchadźa“, Trump znowa twjerdźeše. Na bursach so cła USA raznje wuskutkuja. DAX, indeks najwažnišich předewzaćow, je wo dźesać procentow spadnył.
Jasna kritika na bazy CDU
Čłonojo so na koaliciskich jednanjach mjez uniju a SPD postorkuja
Berlin (dpa/SN). Woteběraceje nahladnosće mjez wolerjemi a interneje kritiki na bazy dla steji unija CDU/CSU při koaliciskich jednanjach z SPD pod ćišćom. Tež w rjadach SPD jewi so kritika.
Dźensa su posrědkowarjo stron w Berlinje dale wo koaliciskim zrěčenju wuradźowali. Wodźacy zastupnicy unije su sej wěsći, zo je z tym poslednja doba zahajena. W tutej rozsudnej fazy CDU a CSU na tym wobstawatej, zo ma koaliciske zrěčenje jasny profil wobeju stron měć. Tak rjekny hessenski ministerski prezident Boris Rhein (CDU) nowinarjam hladajo na wuslědk minjenych wólbow zwjazkoweho sejma: „Zasadnje płaći, zo je mjez uniju a SPD na zwjazkowej runinje wulki procentualny wotstawk. Tole dyrbi so w koaliciskim zrěčenju jasnje wotbłyšćować.“
Pozadk je njespokojnosć na bazy CDU/CSU, zo njeje šef CDU Friedrich Merz we wólbnym boju přilubjenu změnu politiki na polu migraciskeje, hospodarskeje a zakitowanskeje politiki přećiwo woli socialdemokratow přesadźić móhł.
Socialistiske poměry
Premjera sfilmowaneho romana
Pjeć milionow nowych štomow
Drježdźany (dpa/SN). Sakske statne lěsnistwowe předewzaće Sachsenforst chce lětsa něhdźe pjeć milionow młodych štomikow w statnym lěsu sadźeć. „Ponowjenje našich lěsow ma wulki wuznam, zo móhli tež přichodnje drjewo jako wažnu surowiznu lěsow wužiwać“, rjekny sakski minister za lěsnistwo Georg-Ludwig von Breitenbuch (CDU) w Drježdźanach. Nimo toho dźe wo to, mnohostronski ekologiski system lěsa dołhodobnje zachować. Swobodny stat inwestuje za to něhdźe 15 milionow eurow.
Miłe wjedro tomu polěkuje, zo wosadźenje na mnohich městnach hižo widźomnje pokročuje. Starosće pak wobradźeja pobrachowace spadki. Wulki dźěl dźěła su tuž hižo nětko do pózdnjeho lěća a nazymy přestorčić dyrbjeli.
Něhdźe 75 procentow wšěch nowych štomow su lisćowcy, předewšěm buki a duby. Mjez jehlinowcami hraje běła jědla centralnu rólu, wosebje w srjedźnych hórskich kónčinach. Sadźeć chcedźa rostliny na 1 250 hektarach. Z nowymi štomikami přinošuja tež womłodźenju wobstejacych měšanych lěsow a jich skrućenju, minister zdźěli.
Turistikarjo so na jutry wjesela
Lipsk (dpa/SN). Hosćencarjo a hotelownicy wočakuja za jutry a w prózdninach po tym wulki nawal ludźi. „Dowolowe kónčiny su jara požadane. Z městami su ličby knihowanjow hižo nětko wyše hač loni“, rjekny Ines Nebelung, zastupnica sakskeje turistiskeje a marketingoweje towaršnosće powěsćerni dpa. Něhdźe 90 procentow hosći přińdźe po jeje słowach z Němskeje, dalši hosćo přichadźeja z Awstriskeje a Šwicarskeje. Dowolnicy přebywaja tu přerěznje tři do štyrjoch dnjow. Pózdni termin jutrow budźi nadźiju na dobru sezonu. Miłe wjedro drje mnohich pohnuwa, piwowe zahrody wopytać. Štóž chcył jutry z wjetšej skupinu ludźi hosćenc wopytać, njech sej sčasom blido skaza, radźi hłowny jednaćel zwjazka sakskich hotelownikow a hosćencarjow Axel Klein. Branši je wosebje wažne, wokoło jutrow dosć personala za dźěło zdobyć. Někotre iniciatiwy prócuja so wo wukrajne dźěłowe mocy.
Wosebje požadane su jutrowne poskitki we wjesnych kónčinach. Nimo serbskich jutrownych nałožkow wabja tež w Drježdźanach a wokolnych kónčinach wo wopytowarjow.
To a tamne (07.04.25)
Wjace hač 60 pokradnjenych dźěćacych wozyčkow, sedłow a podobnych wěcow su policisća pola porika w Karlsfeldźe blisko Mnichowa našli. Do toho bě młody nan policiji zdźělił, zo su njeznaći dźěćacy wóz swójby pokradnyli. Při wozyčku pak bě sćelak schowany, kotryž dowjedźe policistow k bydlenju podhladneju. Tam namakachu wóz a dalše wěcy w hódnoće wjacorych sta eurow, kotrež bě porik pokradnył a dale předawał.
Nowy wěstotny koncept su krótko do zahajenja turistiskeje sezony w dowolowym srjedźišću Palma na kupje Mallorca předstajili. Alkoholowym ekscesam minjenych lět chcedźa wotnětka zadźěwać, měšćanosta Jaime Mertínez připowědźi. Tak su tři nowe policajske awta kupili. Nimo toho zasadźuja 170 přidatnych uniformowanych a ciwilnych policistow, zo móhli spěšnje zapřimnyć.
Dalše brónjenje wobjednali
Brüssel (dpa/SN). K zakónčenju swojeho dwaj dnjej trajaceho zeńdźenja su so wonkowni ministrojo čłonskich krajow NATO dźensa ze społnomócnjenej Europskeje unije za wonkowne naležnosće Kaju Kallas zetkali. Rěčeć chcychu wo přinošku EU k prócowanjam čłonskich krajow nastupajo brónjenje. Wo chutnosći swojich prócowanjow chcychu tež zakitowanskeho ministra USA Pete Hegsetha přeswědčić. USA Europje wumjetuja, zo dosć za swójske zakitowanje nječini.
Koalicija na dobrym puću
Berlin (dpa/SN). Najebać přiběracu kritiku nastupajo koaliciske jednanja CDU/CSU a SPD staj předsyda CSU Markus Söder a šef SPD Lars Klingbeil na dobrym puću. Na kóncu chcedźa wobdźěleni koaliciske zrěčenje předpołožić, kotrež so „wulkim problemam kraja wěnuje a je rozrisa“, rjekny Söder wčera w sćelaku ZDF. Hospodarske zwjazki dotalne wuslědki jednanjow kritizuja. Wulki njeměr knježi tuchwilu tež na bazy CDU.
Miliony eurow za wutwar syće
Trump: Wšitko za nas činja
Washington (dpa/SN). Prezident USA Donald Trump je po wozjewjenju nowych chłostanskich cłow přećiwo importam ze wšeho swěta k rozmołwam zwólniwy. „Jeli nam něchtó něšto da, je to w porjadku“, rjekny Trump na prašenje žurnalistki, hač je zwólniwy, so z potrjechenymi krajemi dojednać. Nowe cła spožčeja USA „móc, nowe jednanja wjesć“.
„Smy so sami na sedło šofera sydnyli“, republikan rjekny. Do postajenja nowych cłow su druhe kraje wšitke próstwy Američanow wotpokazali. „Nětko woni wšitko za nas činja“, Trump rjekny. Wón dale z toho wuchadźa, zo předewzaća swoju produkciju nětko do USA přepołoža. „Mysliće na to, zo njetrjebaće žane cła płaćić, hdyž swoju twornju w USA natwariće.“
Mjezynarodnje su nowe cła USA tójšto njeměra zbudźili. Na bursach reagowachu akcionarojo panisce. Fachowcy su přeswědčeni, zo cła dotalnu formu mjezynarodneho wikowanja zlemja.
