Spahn nahubnikow dla woprašany
Berlin (dpa/SN). Kritiske postupowanje při wobstaranju nahubnikow za čas koronakrizy bě dźensa hłowna tema w zwjazkowym sejmje. W etatowym wuběrku dyrbještaj bywši minister za strowotnistwo Jens Spahn a tuchwilna ministerka Nina Warken (wobaj CDU) prašenja zapósłancow wotmołwjeć. Wosebje prašachu so za rozprawu wurjadneje přepytowarki Margerety Sudhof, kotruž bě 2024 tehdyši strowotniski minister Karl Lauterbach zasadźił. Sudhof měješe wosebje kupowanje nahubnikow přepytować. Spahn bě swój čas nahubniki bjez wupisanja kupował. To je Němskej škodu wjacorych miliardow eurow naparało. Spahn pokazuje na wurjadne połoženje, kotrež je tehdy wšitkich zamołwitych w njewšědnej formje wužadało.
Předsydka BSW, Sahra Wagenknecht, předźěłanje koronakrizy w přepytowanskim wuběrku jako „politiku wukładneho wokna“ kritizuje. „Njeńdźe jenož wo nahubniki, ale wo njeprawdu, kotraž je so tehdy stała. Lockdown bě zdźěla dospołnje přehnaty“, wona kritizuje.
Wšelakej swětaj
Porjedźenka
Zeleni: Žadanja korony dla skónčić
To a tamne (25.06.25)
Chětro napity a k tomu hišće bjez jězbneje dowolnosće bě paduch w delnjosakskim Stolzenauwje po puću. 36lětny bě do toho sobudźěłaćerjam „Pennyja“ napadnył, jako je w kupnicy kradnył a so po tym z oranžowym transporterom zminył. Policisća awto zadźeržachu. Při tym jim hnydom alkoholowa wóń do nosa stupaše. Test pokaza 3,1 promile. Za jězbnej dowolnosću so jeho podarmo prašachu.
15 000 eurow na jebakow zhubiła je 87lětna žona w durinskim Hermsdorfje. Skućićeljo wudawachu so jako policisća, kotřiž su w susodstwje runje cwólbu paduchow dosahnyli. W jich noticnej knižce namakachu pječa tež adresu staruški. Zo njeby so ničo hórše stało, poručichu žonje, zo pjenjezy z konta wza a jim přepoda. Žona tole činješe.
Dalšich ludźi z Israela přiwjezli
Tel Aviv (dpa/SN). Wójny mjez Israelom a Iranom dla je zwjazkowa wobora dalšich 179 němskich staćanow z lětadłom z Israela do Němskeje přiwjezła. Mašinje typa Airbus A400M stej krótko po połnocy w Frankfurće nad Mohanom přizemiłoj, wonkowne ministerstwo zdźěla. Do toho běchu zamołwići w Israelu dowolili, zo smětej lětadle w Tel Avivje přizemić, byrnjež tam přeco hišće strach dalšich iranskich nadpadow knježił.
Zakaz časopisa zběhnjeny
Berlin/Lipsk (dpa/SN). Prawicarsko-ekstremistiski magacin Compact smě dale wuchadźeć. Zwjazkowe zarjadniske sudnistwo je dotal płaćiwy zakaz dźensa doskónčnje zběhnyło. „Zakładny zakoń zaruči samo njepřećelam wustawy swobodu měnjenja a nowinarstwa“, hłowny sudnik Ingo Kraft rozsud sudnistwa wopodstatni. Bywša nutřkowna ministerka Nancy Faeser (SPD) bě časopis loni w lěću zakazała. Wot toho časa je magacin z nachwilnej dowolnosću wuchadźał.
Inwesticijow dla so dojednali
Israelscy wojacy a pomocnicy pytaja w rozwalinach wjaceposchodoweho ...
Klingbeil etat předpołožił
Twarcy brónjow čakaja na dźěło
Den Haag/Augsburg (dpa/SN). Do zahajenja wjerškoweho zetkanja NATO w Den Haagu žadaja sej němske brónjowe koncerny spěšnu wěstotu planowanja nastupajo nowe nadawki. „Wočakujemy wot wjerška NATO jasne wuznaće čłonskich statow, kotremuž měli skutki sćěhować“, rjekny nawoda wotrjada za brónje lětadłotwarca Airbus Michael Schöllhorn. Zwyšenje wudawkow za brónje měło so spěšnje přesadźić, sej wón žada. „Industrija trjeba wěstotu planowanja a dołhodobne skazanki, zo móhła dźěłać.“
Podobnje wuprajitaj so Augsburgski twarc tankowych motorow Renk a předewzaće brónjenskeje elektroniki Hensoldt. Zwyšenje etata za brónje je koncernam „historiski rozsud“.
Přiměr mjez Iranom a Israelom
Teheran (dpa/SN). Wot prezidenta USA Donalda Trumpa připowědźeny přiměr mjez Iranom a Israelom wot dźensnišeho ranja 6 hodź. płaći. Bjezposrědnje do toho je Iran hišće raz salwu raketow na Israel wottřělił. Jedna z raketow zrazy do města Beerscheba a mori tam štyrjoch wobydlerjow. Iranski statny rozhłós rozprawja, zo je Israelej přiměr „nanuzował“. Wčera bě Iran wojerske lětarske zepěranišćo USA w Kataru z raketami nadběhował. Powětrowy škit pak móžeše wšitke rakety wotwobarać. Nichtó so njezrani.
Němski wonkowny minister Johann Wadephul (CDU) ma po iranskim nadpadźe za zepěranišćo USA diplomatiske rozmołwy mjez USA a Iranom za móžne. Rozmołwy mjez krajomaj bychu spomóžne za region a za wšón swět byli, rjekny Wadephul w sćelaku ARD. Postupowanje Irana přećiwo USA je Wadephulej znamjo, zo Iran swoje srědki łahodnje zasadźa. Tež reakcija Trumpa je wuwažena, tak Wadephul. Dalšej eskalaciji wojerskeho rozestajenja hodźi so tuž zadźěwać“, je sej wonkowny minister wěsty.
