Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W serialu Serbskich Nowin je předstajamy.
Mjez cyłkami, kotrež su so wo spěchowanje prócowali, je tež Serbska lajska dźiwadłowa skupina Chrósćicy. Towarstwo chce přizwolenu sumu 1 500 eurow za nowu techniku nałožić. „Připrawy za zwuk a wobswětlenje, kotrež tučasnje wužiwamy, aktualnemu stawej techniki wjace njewotpowěduja. W minjenych lětach dyrbjachmy sej tuž prawidłownje wěcy wupožčeć. Tohodla smy so na wubědźowanju wobdźělili a so nadźijeli, zo dóstanjemy trěbne srědki za narunanje. Nětko so wězo jara wjeselimy, zo móžemy sej nowe nastroje kupić a tak zdobom kwalitu poskićeć, kajkuž su naši přihladowarjo zwučeni. Cyle připódla nam spěchowanje při tym pomha, lajske dźiwadło na wsy zachować a jeho přichod zaručić“, rozłožuje předsyda lajskeje skupiny Tobias Bulank.