Znowa traktory wótře tukotali

wutora, 07. januara 2020
artikl hódnoćić
(0 )
Alfons Cyž z Jaseńcy wobsadźi 3. městno na Horje. Mjeńšinu a dźesać sekundow móžeše wón swój traktor na čumpadle w runowaze dźeržeć.  Foto: Feliks Haza Alfons Cyž z Jaseńcy wobsadźi 3. městno na Horje. Mjeńšinu a dźesać sekundow móžeše wón swój traktor na čumpadle w runowaze dźeržeć. Foto: Feliks Haza

Šesty króć wotmě so njedźelu na Horje pola Bóšic zymske zetkanje wlečakow. Organizowało bě zarjadowanje Horjanske towarstwo přećelow wlečakow, kotremuž přisłuša 45 čłonow.

Hora (SN/mwe). Mócne tukotanje a přewšo dobra nalada knježeštej zawčerawšim wot 10 hodź. hač do pózdnjeho popołdnja při Horjanskim wjesnym haće, jako zetka so tam něhdźe 200 lubowarjow a wobsedźerjow traktorow a oldtimerow. Mjez nimi běchu přećeljo wlečakow z Koblic, Ralbic­ a Trupina. Tež z Halštrowa bě muž ze swojej Lanz-buldoku přijěł.

„Ideju tajkeho zetkanja smy spontanje zrodźili, k čemuž běchu nas Kobličenjo pohnuwali. Nimale wšitcy smy aktiwnje do ratarstwa zawjazani a tuž je zetkanje wlečakow za nas w januarje najpřihódniše“, wuswětla Robert Ryćer. 27lětny je jedyn­ ze sobuorganizatorow podawka, za kotryž je wjele pilnych rukow trěbnych. Wšako mějachu tež lětsa zaso wjace hač tysac hosći zbliska a zdaloka zastarać. Hospozy běchu tykancy napjekli a kofej zwarili, kotołowy gulaš spřihotowali, kołbaski kaž tež steaki pražili. „Zhromadnosć a dožiwjenje nas fascinujetej. Nimo swjedźenja su to tež wuprawy z traktorami a oldtimerami, hdźež nam mnozy při dróze přikiwaja. Naše dźěći su runje kaž my wusko z ratarstwom zwjazane a so tak za traktory, syčomłóćawy a multicary zajimuja“, wuzběhny Ilona Dehnowa, rodźena Ryćerjec, z Hornjeho Wujězda. Lětsa běchu samo wulku planěrowansku husańcu T 100 z lěta 1960 z Banec pola Zarěča ze sedłowym wlečakom na Horu dowjezli.

Po zhromadnym wobjedźe w stanje wotmě so wosebite wubědźowanje. 20 traktoristow bě ze swojim jězdźidłom na čumpadło zajěło, hdźež mějachu runowahu dźeržeć. Třinaće sekundow – nowy rekord – najlěpši trjebaše, zo by na nim měrnje stejo wostał. To bě přihladowarjam wulke wjeselo. Tajke mnozy tež mějachu, dobywši w tomboli rjane myta, kaž na přikład měch zorna.

Stan a swjedźenišćo su čłonojo Horjanskeho towarstwa wlečakow mjeztym zaso zrumowali a wurjedźili. Najwjetši dźak za spore dźěło wšěm je, zo bě so jim njedźelne 6. zymske zetkanje zaso tak wuběrnje zešlachćiło.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND