Wot ideje k biotopej

pjatk, 27. měrca 2020
artikl hódnoćić
(0 )
Dagmar Steuer je na prěnje zetkanje za swój projekt łopać jako symboliske znamjo sobu přinjesła.  Foto: Silke Richter Dagmar Steuer je na prěnje zetkanje za swój projekt łopać jako symboliske znamjo sobu přinjesła. Foto: Silke Richter

Wojerecy (SiR/SN). Wojerowčanka Dagmar Steuer je projekt do žiwjenja zwołała, na łukach štomy a kerki sadźeć. A je za swoju ideju dotal wjele připóznaća žnjała. Wotpowědnu ležownosć přewostaja wona ze swójskeho wobsydstwa. „Mam wulke wjeselo a začuwam, zo něšto dobre zdokonjam. Widźiš-li, kak sterilnje sej někotři swoju zahrodu wuhotuja, ale sej jabłuka z Južneje Afriki kupuja, da maš tola rozmyslować. Wobhladuju projekt tuž jako jara trěbny. Je to mój přinošk za wobswětoškit. Njeměli rěčeć, ale jednać!“ Mjeztym su wobydlerjo na 1,3 hektary wulkej priwatnej łuce njedaloko Němcow ně­hdźe 250 štomow, kerkow a dalšich rostlin nasadźeli.

Na prěnim informaciskim wječorku spočatk měrca we Wojerowskej Kulturnej fabrice je iniciatorka Dagmar Steuer swoje plany předstajiła, pytajo zdobom za aktiwnymi zajimcami, kotřiž móhli projekt podpěrać. Jedna z nich je krajna architektka Ulrike ­Kühne. W přichodnej zahrodce zmysłow ma aktiwny wobłuk za dźěći nastać. Dale planuja wjacore kćějate łuki za pčołki kaž tež łuki ze sadowcami a jahodowymi kerkami. Hat ma zastaranju z wodu słužić, a nastać maja areale za wočerstwjenje. Wutworić chcyli dale wobchod. Předawać chcedźa tam čerstwe jeja a samowarjenu marmeladu.

Na zarjadowanje přišli běchu čłonojo ze wšelakich towarstwow a iniciatiwow, priwatni zajimcy a wšelacy dźěłodawarjo zasydlenych předewzaćow. Mjez hosćimi běše tež Uwe Proksch, jednaćel Kulturneje fabriki. Wón móže sej we wobłuku projekta „Zelena kroma“ ­derje předstajić, zo hromadźe dźěłaja. Za to we Wojerecach zdźěłany koncept wosta dołho njewobkedźbowany. Jury wubědźowanja „Čiń sobu!“ je sej jón bliže wobhladała a wu­znamjeniła.

Dagmar Steuer a jeje partnerojo chcedźa nětko rozsudźić hač wutworja towarstwo, drustwo, abo hač so přizamknu wjetšemu towarstwu abo iniciatiwje. Tele dny dósta wona powěsć wo spěchowanju z inwesticiskeho programa Sakskeje „Twarić bjez barjerow – Najlubše městna za wšěch“. Spěchowanske srědki 12 000 eurow chcedźa za twar pućikow wužiwać. Za 4. apryl bě dalša akcija sadźenja štomow planowana.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND