Móža wšelake dróhi zwuporjedźeć

srjeda, 01. apryla 2020
artikl hódnoćić
(0 )

Kulow (AK/SN). Město Kulow chce krok po kroku wjacore dróhi w komunje saněrować. „Dźakowano inwesticiskej pawšali Swobodneho stata Sakskeje móžemy někotre dróhi sporjadkować“, podšmórnje zastupowacy nawoda twarskeho zarjada města Kulowa Jurij Brösan. „Předewšěm dźe při tym wo to, asfaltowu worštu zwuporjedźeć a dźěry zapłatać.“

W Kulowje chce město Wulkoždźarowsku dróhu wot Kobrec młyna hač k wotbóčce do Brěžkow na statnej dróze S 285 wobnowić, na Augusta Bebelowej wotrězk wot křižowanišća při zakładnej šuli hač k bywšemu póstowemu zarjadej. W Koćinje chcedźa z pjenjezami z inwesticiskeje pawšale zawróćensku seklu w zadnim dźělu wsy sporjadkować. Tuchwilneho stawa puća dla dyrbi komuna spěšnje jednać. „Naprawu mjeztym hižo wjacore lěta přestorkujemy. Nětko móžemy skónčnje započeć“, Brösan rozłožuje. Małe reparatury zwoprawdźić chce město na dróze z Hózka do Koćiny. Tam su korjenje štomow jězdnju na wjacorych blakach wobškodźili.

Do kotreje měry móže město planowane naprawy zwoprawdźić, chcychu zamołwići hač do 27. měrca rozsudźić. A hač do toho mějachu wudawki za nje wobličene być. Po móžnosći w awgusće chcyli twarske dźěła, kotrež maja po planje něhdźe měsacaj trać, zahajić.

Dale skedźbnja Jurij Brösan na to, zo na teritoriju komuny tuchwilu tež energijowe předewzaće MITNETZ dźěła. W klóšterskej Nowej Wsy kable k zastaranju z milinu do zemje kładźe. Hižo wjacore lěta je město na tele dźěła tłóčiło. „Skónčnje naše prócowanja płody njesu“, praji Brösan wolóženy. Předwidźane dale je, 20kilowoltowski kabl mjez Brěžkami a Mučowom do zemje skłasć. Započeć chcedźa prawje bórze tež kolesowansku šćežku na tym wotrězku twarić. W Kulowje chce firma nimo toho trafostacije, mjez druhim napřećo kěrchowej a na parkowanišću při Starym dwórnišću, ponowić. To rěka, zo starše dodźeržane z mjeńšimi nowymi narunaja.

W dlěšodobnym planje je tohorunja hižo předwidźane kabl z wysokim napjećom mjez delnimi Sulšecami a Dubrjenkom do zemje skłasć. W tej naležnosći pak dyrbja hišće přispomnjenja nošerjow zjawnych zajimow wočaknyć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND