Bjez křižerjow, z mnohim spěwanjom poručenje

wutora, 14. apryla 2020
artikl hódnoćić
(0 )
W katolskich Serbach – kaž tu we Wotrowje – su ludźo ze swojich chěžow stupili a kěrluš „Haleluja, zwońće zwony“ spěwali (foto nalěwo). Ewangelske serbske kemše ze serbskim superintendentom Janom Malinkom ćichi pjatk w Michałskej cyrkwi su wěriwi lětsa prěni raz online sobu swjećili.  Foto: SN/Hanka Šěnec, screenshot: SN W katolskich Serbach – kaž tu we Wotrowje – su ludźo ze swojich chěžow stupili a kěrluš „Haleluja, zwońće zwony“ spěwali (foto nalěwo). Ewangelske serbske kemše ze serbskim superintendentom Janom Malinkom ćichi pjatk w Michałskej cyrkwi su wěriwi lětsa prěni raz online sobu swjećili. Foto: SN/Hanka Šěnec, screenshot: SN

Jutry 2020 běchu koronawirusa dla tež w Serbach cyle hinaše, w Bukecach so horstka zetkała

Budyšin (at/SN). Jutry w času koronawirusa. „Mje wutroba boli, hdyž na lětuše jutry bjez zjawnych Božich mšow w našich cyrkwjach a bjez starodostojnych serbskich wobrjadow kaž křižerstwa abo jutrowneho spěwanja myslu. Zdobom widźu wulku šansu, zo tule wuwzaćnu situaciju wužijemy a šěršej zjawnosći jadro­ poselstwa Chrystoweho zrowastanjenja spřistupnimy.“ Mysle předsydy Domowiny Dawida Statnika zwuraznichu wuwzaćne połoženje w tydźenjach krutych wobmjezowanjow za ludźi koronawirusa dla. Šef narodneje organizacije posylni wěriwych, „jutrońčku po dokónčenju serbskich rańšich kemšow w rozhłosu z woknom won abo před durjemi swojeho domskeho kěrluš ,Haleluja, zwońće zwony‘ zaspěwać.“

A kak su swójby to sčinili, čitajće na stronje 4. Najebać zakazane procesiony njejsu so jednotliwcy po tym měli. Z Róžanta zhonichmy, zo běchu jutrowničku rano třo křižerjo do wsy přijěchali a poselstwo zrowastanjenja Chrystusa wozjewili. Tež we Wotrowje a Smjerdźacej sy jednotliwych jěcharjow wuhladał.

Serbska ewangelska premjera

Serbscy ewangelscy wěriwi dožiwichu ćichi pjatk premjeru. Tradicionalne kemše swjećeše serbski superintendent Jan Malink drje w Michałskej cyrkwi, te pak běchu natočene a we wobłuku online-wustupa Budyskeje Pětrowskeje wosady přistupne. Malink prědowaše na bibliske słowa 53. stawa profeta Jezaje „zawěrnje wón njeseše našu chorosć a napołoži sebi naše­ bolosće“ a nawjaza na aktualne wuwi­će: „Serbske jutry su zakazane, žane jutrowne wiki, žani křižerjo, pandemija změni naše žiwjenje. Mamy tež dobre serbske mjena za pandemiju, za chorosće, kiž so wšudźe rozšěrja. Słowo mrětwa je so zadomiło w Serbach a prjedy praješe so mór za chorosće, kiž so wot samo rozšěrjeja, kiž ludźi morjachu.“ Wón přiwobroći so tym, kiž w hladarnjach dźěłaja, hdźež je riziko so natyknyć nimoměry wulke. Hladarjo njesu „chorosće tych, kiž tam bydla. Runje tak kaž wšitcy, kiž w strowotnistwje dźěłaja.“

Jutrowne spěwanje we Wuježku drje wupadny. Z tym pak njejsu so w Bukečanskej wosadźe wotnamakali. Horstka pjeć ludźi zetka so jutry njedźelu napoł sedmich při Lutherowej lipje za Buke­čanskej cyrkwju na dwurěčne jutrowne spěwanje a je tak horjestawanje Jezusa Chrysta swjećiła, kaž předsyda Serbskeho ewangelskeho towarstwa Mato Krygaŕ zdźěli. Nochcychu lěta 2013 wožiwjeny nałožk cyle wupadnyć dać. Farar Thomas Haenchen swjećeše nutrnosć w serbskej rěči. Tak běše w Bukecach zaso jónu po něhdźe 65 lětach jutrowne spěwanje.

Ewangelscy Delni Serbja njesmědźachu swoju jutrownu Serbsku namšu jako wosada swjećić. Rozhłosowy sćelak RBB pak bě bohosłužbu, kotruž swjećeše farar Ingolf Kśěnka, w Janšojskej cyrkwi natočił a jutry póndźelu připołdnju wusyłał.

We wšelakich Budyskich hasach, tak na Martina Hoopowej, běchu jutrowničku z woknow bydlenjow na instrumentach přednjesene kěrluše słyšeć.

Zhromadnosć zachować

We Vatikanskej Pětrowej cyrkwi je bamž Franciskus žohnowanje Urbi et Orbi wudźělił. Cyrkej a naměsto, hdźež so jutry hewak dźesaćitysacy wěriwych a putnikow tłóča, běštej prózdnej.

„Přeju Wam a mi runje tak, zo tež nětko prajimy, za wokomik dyrbi to tak być, kaž je. Ale dźe dale“, rjekny krajny biskop Ewangelsko-lutherskeje krajneje cyrkwje Sakskeje Tobias Bilz w swojim jutrownym poselstwje, „nowe žiwjenje je móžne. Tež nowa kwalita žiwjenja.“

Drježdźansko-Mišnjanski biskop Heinrich Timmerevers přizna w jutrownym poselstwje, zo jeho jima „tale sobučłowjeskosć. Nadźijam so, zo zachowamy sej tule kwalitu zhromadnosće přez krizu“ koronawirusa dla. A wón so praša: „Što poprawom je bytostne? Něštožkuli, štož mějachmy za małe a njewuznamne, wopokaza so w krizy jako ,za system re­lewantne‘.“

Turizm ćerpi

Budyšin (SN/UM). „Nalada njeje runjewon najlěpša.“ Dietmar Stange so di­rekt­nje wupraja, hdyž na lětuše jutry zhla­duje. Předsyda Budyskeho turistiskeho towarstwa dźě cyle dokładnje wě, kajku wažnu rólu tónle kónc tydźenja za samopomjenowanu „jutrownu stolicu“ ma. A tónraz njemějachu w měsće žanych křižerjow, na Hrodźišku njebě žane jejkakulenje. Koronawirus je turistiskich poski­ćerjow w najnjepřijomnišim času trjechił­. Normalnje maja tu pjećcyfrowu ličbu wopytowarjow – cyle dokładnje to njewědźa –, kotřiž přebywaja přez jutry w sprjewinym měsće, zo bychu sej tu křižerski procesion wobhladali, jejkakulenje dožiwili, po jutrownych wikach so rozhladowali a sej wězo tež chłóšćenki w nje­ličomnych hosćencach zesłodźeć dali.

Tak bě so ličba přenocowanjow w Budyšinje naposledk jara derje wuwiła. Po na­prašowanju Marketingoweje towaršnosće Hornja Łužica-Delnja Šleska (MGO) je w „jutrownym měsacu“ 2018 cyłkownje 13 725 ludźi město nad Sprjewju wopytało. Loni w aprylu bě jich 15 414. Za cyłu Łužicu trochowachu ličbu na 145 000 do 160 000 přenocowanjow. Jeli z toho wuchadźamy, zo tuchwilne wobmjezowanje wopytow a jězbow hač do kónca měsaca po­dlěša, móhło město Budyšin tak hač do 600 000 eurow dochodow přisadźić. Jako zakład wobličenjow bjerje jězbny portal Booking.com přerěznu płaćiznu 83 eurow na dwu­wo­sobowu stwu. Za cyłu Hornju Łužicu bychu to straty we wobjimje 6,5 milionow eurow byli. We wobličenju wobkedźbowane njejsu pjenjezy, kotrež bychu wopytowarjo hosćencow abo ludźo za nakupowanje wudali.

Dietmar Stange a čłonojo Budyskeho turistiskeho towarstwa pak njedadźa so zatrašić, wuchadźejo z toho, „zo so turizm w Budyšinje spěšnje zaso zhraba a zo město dale tajki woblubowany wulět­ny cil wostanje“. Tak tež z plano­wanjom dalšich turistiskich aktiwitow w běhu lěta pokročuja. Přihotuja tuž staroměšćanski festiwal, kotryž ma so wot 28. do 30. awgusta wotměć. Budyske žono­powe tydźenje wot 11. awgusta do 6. septembra tohorunja na planje steja. Festiwal korčmow 4. meje a Budyske nalěćo, kotrež bě wot 29. meje do 1. junija předwidźane, pak je město wotprajiło.

Nětko so Dietmar Stange najprjedy raz wjeseli, zo je Budyska wobdźělenska a wobhospodarjenska towaršnosć jutrownu studnju na Mjasowych wikach wupyšiła, kaž bě to tež minjene lěta z wašnjom. A jutrowne wiki ćichu sobotu móžachu pod krutymi wěstotnymi naprawami a w mjeńšej formje tohorunja přewjesć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND