Město Kamjenc přewostaja kóždemu wobydlerjej škit za hubu a nós

wutora, 14. apryla 2020
artikl hódnoćić
(0 )
17 000 zakryćow za hubu a nós zhotowja za město Kamjenc tamniše předewzaće Sachsen Fahnen GmbH. Poslednje chcedźa jutře dodawać.  Foto: Philipp Kolloch 17 000 zakryćow za hubu a nós zhotowja za město Kamjenc tamniše předewzaće Sachsen Fahnen GmbH. Poslednje chcedźa jutře dodawać. Foto: Philipp Kolloch

Kamjenc/Budyšin (SN/at). Podawkaj stej so minjenu srjedu skoro kryłoj: W Budyšinje pominaše dr. Jana Gärtner, hamtska lěkarka Budyskeho wokrjesa, ludźi, koronawirusa dla nětko hubu a nós ze samošitym tekstilnym zakryćom škitać. W Kamjenskej radnicy je tamniše předewzaće Sachsen Fahnen GmbH prěnje 3 000 tekstilnych maskow přepodało, kotrež­ bě komuna tam skazała. Krótkodobnje je firma swoju produkciju rozšěriła, wobkrući jednaćel Jürgen Ruhland.

Kriza koronawirusa dla bě zamołwitym w Lessingowym měsće kazała, wulce njerěčeć, ale jednać. „Smy so po rozmyslowanjach w radźe staršich a w měšćanskej radźe za to rozsudźili, kóždemu wobydlerjej města Kamjenca wysokohódnotne, znowa wužiwajomne zakryće za hubu a nós přewostajić“, wuswětla Ka­mjen­ski wyši měšćanosta Roland Dantz (njestronjan), „wšitkim měšćanam, tež tym, kotřiž w starownjach a hladarnjach bydla.“ Dantz rěči nastupajo tajki škit strowoty wo „prěnim wuhotowanju“ za wšitkich 17 000 wobydlerjow.

W Kamjencu njeje durinske bjezwo­krjesne město Jena z přikładom było. Tam maja sej ludźo mjeztym tydźeń w kup­nicy, busu a tramwajce dychanski škit stajić. Winowatosć pak, sej korona­wirusa dla hubu a nós zakrywać, smě ludnosći w Budyskim wokrjesu jenož wokrjesny strowotniski zarjad kazać. „My přewo­stajamy tele zakryće. Tak činimy to, štož je nam jenož móžne a rozumne, zo bychmy Kamjenčanam pomhali.“ W měsće su so za kup maskow rozsudźili, hdyž běchu fachowcy hišće wšelakeho měnjenja wo jich wužitku. Tu ma Kamjenc porno druhim wjetšim městam Budyskeho wokrjesa samo hišće lěpšinu wukoniteju lokalneju partnerow za wotpohladanu naprawu. Nimo předewzaća Sachsen Fah­nen je to firma Raetz Textilien.

W radnicomaj we Wojerecach a Budyšinje dotalne myslenje tak daloko njeń­dźe. Su naležnosć we wosebitym gremiju koronawirusa dla rozjimali, zdźěli Olaf Dominick, nawoda staboweho městna pola Wojerowskeho wyšeho měšćanosty. Tak kaž w Kamjencu wšitkich wobydlerjow z tajkim „prěnim“ škitom wuhotować chcyć, wo tym dotal žana rěč njebě. We Wojerowskim měšćanskim zarjadnistwje staraja so wo to, zo swójscy sobudźěłaćerki a sobudźěłaćerjo, kiž w kontakće z měšćanami na tajki škit pokazani su, jón tež dóstanu. Šiće tekstilnych zakryćow hospodarske spěchowanje města podpěruje. Ale tež přistajeni měšćanskeho zarjadnistwa so gratu přimaja.

Podobne su informacije z Budyskeje radnicy. Wšoměšćanske rozrisanje tuchwilu wotpohladane njeje, wšako bychu za to přidatne srědki z běžneho etata komuny trěbne byli. Po słowach nowinskeje rěčnicy Laury Ziegler bědźi so tež město Budyšin z přidatnymi wudawkami, kotrež wurostu prosće z běžnych kóštow za nachwilnje zawrjene wobłuki.

Šěršeho wida na wobydlerjow runje tak w Niskej njeje. W radnicy komuny z najwjetšej ličbu z wirusom Covid-19 inficěrowanych w Zhorjelskim wokrjesu steji škit personala w srjedźišću, kotryž ma kontakt z wobydlerjemi, rjekny nawodnica techniskich słužbow Barbara Giesel.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND