Kamjenc/Budyšin (SN/at). Podawkaj stej so minjenu srjedu skoro kryłoj: W Budyšinje pominaše dr. Jana Gärtner, hamtska lěkarka Budyskeho wokrjesa, ludźi, koronawirusa dla nětko hubu a nós ze samošitym tekstilnym zakryćom škitać. W Kamjenskej radnicy je tamniše předewzaće Sachsen Fahnen GmbH prěnje 3 000 tekstilnych maskow přepodało, kotrež­ bě komuna tam skazała. Krótkodobnje je firma swoju produkciju rozšěriła, wobkrući jednaćel Jürgen Ruhland.

Kriza koronawirusa dla bě zamołwitym w Lessingowym měsće kazała, wulce njerěčeć, ale jednać. „Smy so po rozmyslowanjach w radźe staršich a w měšćanskej radźe za to rozsudźili, kóždemu wobydlerjej města Kamjenca wysokohódnotne, znowa wužiwajomne zakryće za hubu a nós přewostajić“, wuswětla Ka­mjen­ski wyši měšćanosta Roland Dantz (njestronjan), „wšitkim měšćanam, tež tym, kotřiž w starownjach a hladarnjach bydla.“ Dantz rěči nastupajo tajki škit strowoty wo „prěnim wuhotowanju“ za wšitkich 17 000 wobydlerjow.