Korony dla w nowym błyšću

wutora, 14. apryla 2020
artikl hódnoćić
(0 )
Naša awtorka Marie-Luise Matješkec je  Lipšćansku „Centrifugu“ njedawno sobu ponowiła a so nadźija, zo móža woblubowane zetkanišćo studentow bórze poswjećić.  Foto: Matej Wjeńka Naša awtorka Marie-Luise Matješkec je Lipšćansku „Centrifugu“ njedawno sobu ponowiła a so nadźija, zo móža woblubowane zetkanišćo studentow bórze poswjećić. Foto: Matej Wjeńka

Serbske Nowiny namołwjeja swojich čita­rjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće­ nam na redaktion@serbske­nowiny.de. K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Marie-Luise Matješkec z Hórkow pisa:

Lětdźesatk dołho studenća mjeztym hižo w „Centrifuze“ na Arna Nitzschowej w Lipsku hejsuja a wšelke zarjadowanja přewjeduja. Njemóžu sej docyła před­stajić, kelko ludźi a z nimi tež wšelakich dožiwjenjow je tale rumnosć hižo zwjazowała. Napohlad po telko lětach wězo chětro ćerpi. Hdyž sej sćěny dokładnje wobhladaš, widźiš tójšto mazanych wotšudrowanych blakow a zdźěla wottorhanu tapetu. Wězo wučinja to trochu studentski flair, při­wšěm so tola zaso raz za rjeń­šim napohladom žedźiš. Loni smy w Sorabiji ideju wuwili, „centri“ porjadnje wobělić. Bě to jeničce myslička, ale konkretne plany njejsmy ženje wuwili. Matej Wjeńka a ja, wobaj studentaj wučerstwa w Lipsku, mějachmoj pak po wudyrjenju koronakrizy nadobo tójšto swobodneho časa, byrnjež do toho hišće połnje w přihotach na pruwowanja byłoj, kotrež su wšitke wotprajene. To bě wulkotna móžnosć, loni njedomyslenu ideju zwoprawdźić.

Tak wuwichmoj swój „korona-projekt“. Jako běchu twaršćiznowe wobchody hišće wotewrjene, dojědźechmoj sej spěšnje po běłu barbu, seršćowcy a škitnej kitlej. Po dorěčenju ze studentskim skutkom móžachmoj započeć rumnosć wurumować. Při bělenju namaj spěšnje napadny, zo trjebaja sćěny znajmjeńša dwójnu worštu barby. To pak njebě problem, wšako naju čas njehonješe.

Po molerskich dźěłach a znowaza­rumowanju „Centrifugi“ móžemy tam nětko w nowym błyšću zaso projekty orga­nizować a swjedźenje wuhotować. Hdy tak daloko budźe, pak njemóže nichtó rjec. Legendarne chodojtypalenje Lipšćanskeje Sorabije lětsa po wšěm zdaću­ do wody padnje, ale snano směmy so na me­jemjetanje nadźijeć a potom z mócnym „Sorabija, haleluja“ wobnowjenu „centri“ poswjećić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND