We wosebitym času wosebity serwis poskićili

póndźela, 27. apryla 2020
artikl hódnoćić
(0 )
Dobry wothłós žněješe minjeny pjatk a sobotu akcija Njebjelčanskeje gmejny, zo móžachu tam wobydlerjo swoje wurězane hałzy wotbyć.  Foto: Angelika Krječmarjowa Dobry wothłós žněješe minjeny pjatk a sobotu akcija Njebjelčanskeje gmejny, zo móžachu tam wobydlerjo swoje wurězane hałzy wotbyć. Foto: Angelika Krječmarjowa

Njebjelčicy (AKr/SN). Dokelž dyrbi lětsa tež tradicionelne chodojtypalenje koronawirusa dla wupadnyć, je sej Njebjelčanska gmejna akciju za swojich woby­dlerjow wumysliła. Wjacori wjesnjenjo běchu so hižo do toho wobhonili, hdźe móža swoje wjetše a mjeńše hałzy wotbyć, njeje-li móžno je na zwučene městno zwozyć. Tak zrodźichu ideju, tajki serwis­ w gmejnskim twarskim zawodźe poskićić. Wobydlerjo mějachu minjeny pjatk a sobotu składnosć, tam wurězane hałzy bjezpłatnje wotedać. Pozdźišo je Wätzigec firma na małe kuski rozdźěła. Štóž chce potom hotowy rěz měć, smě sej jón kupić. Wšako dyrbi gmejna firmu a přistajenych zapłaćić. Zbytk budźe za swoje ležownosće trjebać.

Wothłós mjez wobydlerjemi bě dobry. Hižo pjatk ludźo z awtom a připowěšakom abo mjeńšim abo wjetšim traktorom hałzy do Njebjelčic wožachu. Tež sobotu tam pospochi jězdźachu. Dokelž bu akcija krótkodobnje přewjedźena, njeje informacija bohužel do wšitkich domjacnosćow gmejny dóšła.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND