Plan za Kamjensku kupjel steji

wutora, 28. apryla 2020
artikl hódnoćić
(0 )

Kamjenska płuwanska hala bě wospjet tema Budyskeho wokrjesneho sejmika. Hačrunjež su so jeho zapósłancy na dalše postupowanje dojednali, mjezsobne wumjetowanja wostanu. Zapósłanc SPD Gerhard Lemm měni, zo AfD kupjel za populizm znjewužiwa.

Kamjenc (UM/SN). Budyski wokrjesny sejmik je so na wčerawšim posedźenju na dalše postupowanje Kamjenskeje płuwanskeje hale dla dojednał. Jenož dwaj zapósłancaj hłosowaštaj přećiwo naćiskej wokrjesneho zarjada. Wobzamknjeny naćisk předwidźi, dotalne planowanja zakónčić a wotprědka započeć. „Wukopało so je, zo dotalny wotpohlad – kombinować sportowu a dožiwjensku kupjel – zwoprawdźomny njeje“, wuswětli naměstnik Budyskeho krajneho rady Udo Wićaz (CDU). Wotpowědne plany pokazuja, zo tajka měšana kupjel wo wjele wjac pjenjez płaći hač předwidźane 15 milionow eurow. A nimo toho njehodźi so – kaž wotpohladane – we wobłuku programa GRW Infra spěchować.

Rozjimać maja nětko tuž spěchowanske móžnosće za ryzy šulsku a sportowu płuwansku halu a wotpowědny potrjebowy plan zestajeć. „Dotalne plany budu hladajo na móžne dalše wužiwanje pruwowane“, rěka we wčerawšim wobzamknjenju sejmika. Hižo wjac hač 300 000 eurow dźě su plany za nowu Kamjensku kupjel płaćili, njeměli tuž podarmo być.

Frakcija AfD bě naćisk zapodała, kotryž bě po słowje nimale samsny kaž tón wo­krjesneho zarjada a je jón zaso cofnyła.

Byrnjež sej zapósłancy frakcijow wokrjesneho sejmika we wulkej měrje přezjedni byli, dóńdźe wčera k zdźěla raznym werbalnym rozestajenjam mjez Heiku Lotze a předsydu frakcije AfD Henryjom Nitzschu kaž tež předsydu frakcije SPD Gerhardom Lemmom. Wobě stronje wumjetowaštej sej populizm a njepřiměrjene wustupowanje. Pozadk toho je, zo bě sej AfD wosebite februarske posedźenje w zwisku z Kamjenskej kupjelu žadała. Te pak so bjez wuslědka skónči, dokelž su sej SPD, Lěwica a Zeleni žadali, naležnosć wotpowědnym zamołwitym wuběrkam dale dać. Po tym planowane posedźenje w měrcu bu koronapandemije dla wotprajene. „W tym zwisku smy šěsć tydźenjow zhubili“, Udo Wićaz wčera rjekny. Wuslědki nětko wobzamknjenych pruwowanjow njebudu tuž hišće w meji, ale skerje hakle w juliju předpołožić móc.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND