Wałpornu nóc ludźo na swójskich ležownosćach małe wohenčki palili
Kulow/delnje Sulšecy/Smjerdźaca/Dobrošicy (aha/SN). Nałožki w běhu lěta su nam kaž časowe mězniki a nas na to dopominaja, kak spěšnje so čas minje. Po ptačim kwasu móžachu so póstniske nory hišće porjadnje wucychnować, ale po tym bě koronapandemije dla nadobo wšitko hinak. Bolostne bě, zo dyrbjachmy lětsa jutry bjez křižerskich procesionow dožiwić. Mjeztym je so apryl bjez chodojtypalenja minył. Wosebje dźěći a młodostni dźě so kóžde lěto na nje kaž tež na mejestajenje wjesela. A hdyž meja padnje, je to stajnje zwjazane z rjanym zhromadnym swjedźenjom. Tola tež to je lětsa hinak, zo by so natyknjenju ze strašnym wirusom zadźěwało.