Na mnohich wsach meju stajeli

póndźela, 04. meje 2020
artikl hódnoćić
(0 )
Z ćežkim nastrojom su Radworscy młodostni swoju meju stajili, zo bychu předpisy koronakrizy dla dodźerželi. Dowolnosć, 22 metrow wysoki štom na nawsy stajić a jón pozdźišo tež zaso powalić, běchu wot wobeju wjesnjanostow dóstali. Za mejemjetanje chcedźa samo livestream zarjadować, tak zo móža zajimcy nałožk tež digitalnje sćěhować.  Foto: Jakub Wowčer Z ćežkim nastrojom su Radworscy młodostni swoju meju stajili, zo bychu předpisy koronakrizy dla dodźerželi. Dowolnosć, 22 metrow wysoki štom na nawsy stajić a jón pozdźišo tež zaso powalić, běchu wot wobeju wjesnjanostow dóstali. Za mejemjetanje chcedźa samo livestream zarjadować, tak zo móža zajimcy nałožk tež digitalnje sćěhować. Foto: Jakub Wowčer

Wałpornu nóc ludźo na swójskich ležownosćach małe wohenčki palili

Kulow/delnje Sulšecy/Smjerdźaca/Dobrošicy (aha/SN). Nałožki w běhu lěta su nam kaž časowe mězniki a nas na to dopominaja, kak spěšnje so čas minje. Po ptačim kwasu móžachu so póstniske nory hišće porjadnje wucychnować, ale po tym bě koronapandemije dla nadobo wšitko hinak. Bolostne bě, zo dyrbjachmy lětsa jutry bjez křižerskich procesionow dožiwić. Mjeztym je so apryl bjez chodojtypalenja minył. Wosebje dźěći a młodostni dźě so kóžde lěto na nje kaž tež na mejestajenje wjesela. A hdyž meja padnje, je to stajnje zwjazane z rjanym zhromadnym swjedźenjom. Tola tež to je lětsa hinak, zo by so natyknjenju ze strašnym wirusom zadźěwało.

Rozhladujo so po Kulowje sy z městnami na zahrodach małe wohenčki wuhladał. Tak sej na přikład pola Milana Šefera cyła swójba zhromadnje kołbaski pražeše. Za to drje trjebaše dowolnosć měšćanskeho zarjadnistwa, hdźež pak su jeho próstwu schwalili, směć po tradiciji mały woheń na swójskej zahrodźe wotpalić. W Salowje a delnich Sulšecach su samo wulki mejski štom stajili. Sulšečanski wjesny předstejićer Jurij Brösan hódnoćeše, zo je trjeba wěstotne postajenja dodźeržeć, a tak su tam jeničce třo wjesnjenjo z techniku meju stajili.

Za gmejny zarjadniskeho zwjazka Při Klóšterskej wodźe je tamniši předsyda Měrko Domaška w hamtskim łopjenu w mjenje wjesnjanostow postajił, zo njesmědźa nihdźe na wsach chodojty palić, ale tež žanu meju stajeć. Wjele lět pěstowanu tradiciju dyrbjachu tuž z teje přičiny w Smjerdźacej přetorhnyć. Rachelic-Kühnec swójbni su tuž mjeńšu meju na swójsku zahrodu stajili, a to něhdźe dźesać metrow wysoku, pyšenu z módro-čerwjeno-běłymi banćikami. Kerstin Kühnowa z mandźelskim Andrejom, jeju tři dźěći Martin, Anna kaž tež Lena a tohorunja dźěd Pětr Rachel so wjeselachu, zo su bliši a zdaleniši susodźa jich ideju chwalobnje připóznali. Tež na dalšich wsach, kaž w Němcach, Koćinje, Miłoćicach a Radworju, su wjesne meje abo mejske štomiki na priwatnych ležownosćach stajili.

Na wjacorych městnach, mjez druhim w Kozarcach, we Worklecach a druhdźe sy widźał, kak swójby na swojej zahrodźe při małym wohenju zhromadnje swjeća. W Dobrošicach wědźeše Marko Dźisławk dźěćom Mili, Valentinej a Maice wjele powědać, a tak woni wulki tradicionalny woheń chodojtypalenja tak jara njeparowachu. Přiwšěm Dźisławkecy kaž tež mnozy Dobroščenjo wobžaruja, zo lětsa při wjesnej kapałce žana meja njesteji. Wšako su hakle před lětomaj nałožk zaso wozrodźili, po tym zo njebě tam 65 lět žana meja stała.

wozjewjene w: Lokalka

Galerija

dalši wobraz (1) W Dobrošicach su sej Dźisławkecy doma na swójskej ležownosći sami lěhwowy wohenčk zapyrili a sej tež kołbaski pražili. Foto: Alfons Handrik
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND