Sakska SPD sej žada AfD přez krajny wustawoškit wobkedźbować

Drježdźany/Podstupim (dpa/SN). SPD w Sakskej žada sej tež w swobodnym staće, zo wustawoškit AfD jeje prawicarskoekstremnych tendencow dla wobkedźbuje. Wustawowy škit stronu AfD z połnym prawom w Braniborskej a Durinskej wobkedźbuje, rjekny generalny sekretar sakskeje SPD Henning Homann wčera w Drježdźanach. „Wočakuju wot sakskeho wustawoškita, zo nětko prawicarskoekstremistiske wuwiće w AfD tež w Sakskej wobkedźbuje.“

Nawodnistwo sakskeje AfD z krajnym předsydu Jörgom Urbanom a generalnym sekretarom Janom Zwergom je minjenu sobotu w Sebnitzu zhromadnje z bywšim brani­borskim krajnym předsydu Andreasom Kalbitzom wustupowało. Zjawne wuznaće solidarity „z wočiwidnym fašistom Andreasom Kalbitzom“, pokazuje, kajki duch nawodnistwo AfD w swobodnym staće pěstuje. „AfD njeje w Sakskej žana konserwatiwna strona, jako kajkaž so w zjawnosći rady wudawa, ale zeskupjenje prawicarskich ekstre­mistow abo tež karjeristow, kotřiž za politisku móc tež z fašistami paktěruja“, Henning Homann kritizuje.