Nimo wulkich nadregionalnych a w medijach prezentnych serbskich towarstwow mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Halštrowsku młodźinu w delnich Sulšecach (17).
Nimale 300 wobydlerjow maja delnje Sulšecy, kotrež přisłušeja wot lěta 1994 Kulowej. We wosomdźesatych lětach 19. lětstotka naliči tam Arnošt Muka mjez 205 wobydlerjemi dwěsćě Serbow. Před 60 lětami bě jich po Arnošće Černiku jenož hišće połojca. Zo bychu serbsku rěč a kulturu we wsy zachowali, so lěto po zagmejnowanju do Kulowa rjad młodostnych zeńdźe, rozmyslujo, kak móhli to podpěrać. Tak załožichu w nowembru 1995 towarstwo Sulšečanska Halštrowska młodźina a podšmórnychu na te wašnje identifikaciju ze swojej něhdy ryzy serbskej wsu nad Čornym Halštrowom.
