Wojerecy (KD/SN). Po wjacorych lětach planowanja a twarskeho časa su minjeny pjatk Wojerowsku nowu centralnu wyšu šulu oficialnje přepodali. Hižo prěni dźeń noweho šulskeho lěta, póndźelu, běchu do njeje zaćahnyli, pjatk slědo­waše oficialna swjatočnosć. Na njej wobdźěli so sakski ministerski prezident ­Michael Kretschmer (CDU), kiž bě „wulce zahorjeny wo tym, štož je tule nastało“. Wón chce samo Lipšćanskim studentam pedagogiki poručić, sej kubłanišćo z jeho za Saksku jónkrótnymi móžnosćemi wuknjenja wobhladać.

Předchadne twarjenje noweho kubłanišća běchu wot lěta 1959 jako šulu wužiwali. Hač do 2002 bě tu Zusowy gymnazij zaměstnjeny. Po tym bě dom prózdny. 2016 bě měšćanska rada wobzamknyła, pod pomnikoškitom stejace twarjenje jako nowu wyšu šulu wožiwić. „Přetwar a saněrowanje domu je najwjetša a najwažniša inwesticija do přichoda našeho města, přetož kubłanje je centralna tema w zwisku ze strukturnej změnu“, rjekny Wojerowski wyši měšćanosta Stefan Skora (CDU). Projekt płaćeše dohromady 13 milionow eurow.