Srědki za zakładnu šulu a gmejnske dźěle wužiwać

srjeda, 16. septembera 2020
artikl hódnoćić
(0 )

Łaz (AK/SN). Sakska gmejna Łaz chce 70 000 eurow lětušeje pawšale Swobodneho stata Sakska za sylnjenje wjesneho ruma wužiwać zaměrnje za Wulko­ždźarowsku Zakładnu šulu „Při Hórnikečanskim jězoru“ a za wjesne dźěle. To su gmejnscy radźićeljo wčera potwjerdźili. 50 000 eurow trjebaja za podruž kontejneroweje připrawy při šuli. Za šulerjow trěbny je narunanski twar, nutřkowneho wobnowjenja šulskeho domu dla. Za 15 wjesnych dźělow chce gmejna 20 000 eurow nałožić. Wobzamknjenje za wužiwanje pawšale bě trěbne, dokelž njeběchu so radźićeljo na swojim posedźenju 14. julija dojednać móhli.

Steffen Mühl (Swobodni wolerjo Łaz) bě namjetował pjenjezy wotpowědnje zasadźić. Tak dyrbi Łazowska gmejna přidatnje 10 000 eurow z etata brać. Wjesnjanosta a zarjadnistwo, tak formulowaše Mühl w swojej próstwje, měłoj pruwować, hač je to móžno. 30 000 eurow měli runohódnje na wšitke wjesne dźěle po 2 000 eurach rozdźělić. Ze šěsć přihłosowanjemi, wosom přećiwnymi hłosami a jednym hłosawzdaćom bu próstwa wotpokazana. Angela Kubicki (CDU) a Hagen Aust (CDU) namjetowaštaj, 50 000 eurow za kontejnerowu připrawu a 20 000 eurow za šulu runohódnje rozdźělić. Kóždy wjesny dźěl by tak 1 333 eurow dóstał. „Mam za wažne wšitke wjesne dźěle runohódnje wobhladować“, ­měnješe Angela Kubicki. Tónle namjet su radźićeljo skónčnje z wosom přihłosowanjemi, šěsć přećiwnymi hłosami a jednym hłosa­wzdaćom přiwzali.

Pawšalu dóstawaja sakske komuny wot lěta 2018. Wona słuži sylnjenju wsow. Pjenjezy wužiwać móža gmejny za inwestiwne naležnosće, kaž za twar šulow, za dźěćace dnjowe přebywanišća, za dróhotwar, za sportnišća a dalše. Runočasnje je wužiwanje za běžnu potrjebu móžne, na přikład za wurunanje etata, za socialne a dalše zaměry. Gmejny maja kóžde lěto hač do 31. decembra krajnoradnemu zarjadej dopokazać, za čo su srědki nałožili.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND