Archiwny zwjazk swój onlinowy poskitk rozšěrja

štwórtk, 21. januara 2021
artikl hódnoćić
(0 )
Wobalka wosoboweje dawkoweje knihi z lěta 1802, kotraž je we wobstatku Budyskeho archiwneho zwjazka  Foto: Měšćanski archiw Wobalka wosoboweje dawkoweje knihi z lěta 1802, kotraž je we wobstatku Budyskeho archiwneho zwjazka Foto: Měšćanski archiw

Budyšin (SN/MWj). Posledni kwartal lěta 2020 su w Budyskim archiwnym zwjazku za to wužiwali, zo bychu swój onlinowy poskitk dale rozšěrili. Tam nimaja jenož wopisma, zapiski stawnistwa, radne protokole, zapiski wo křćeńcach, wěrowanjach a zemrětych a wšelake chroniki. Wot najnowšeho je nětko tež register dawkow jednotliwych wosobow digitalnje přistupny, rěka w nowinskim wozjewjenju měšćanskeho zarjadnistwa.

Tak mjenowany wosobowy dawk bu w lěće 1766 zawjedźeny, 1835 stupi na jeho městno přemysłowy a personalny dawk, pozdźiši dochodowy dawk. W nětko zjawnje přistupnych hamtskich knihach su zapisani w měsće a přisłušacych wsach bydlacy kaž tež jich dawk, kotryž mějachu płaćić. Štóž so ze swójbnymi stawiznami zaběra, móhł rešeršować, hač a hdźe su předchadnicy w měsće abo na wsach bydlili. Knihi pak su tohorunja za najwšelakoriše domiznowědne a za socialno-historiske slědźenje wažne žórło. Wone mjenujcy podawaja dohlad do struktury a hospodarskeje mocy woby­dlerstwa města Budyšina we 18. a 19. lětstotku.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND