Parkowanje při Bjerwałdskim jězoru na wšelakore wašnje zapłaćić
Hamor (AK/SN). Za parkowanje při Bjerwałdskim jězoru budu wopytowarjo bórze nowe parkowanske awtomaty wužiwać móc. Te chcedźa krok po kroku na městnje dotalnych dźesać awtomatow nastajić, kotrež bě Hamorska gmejna w lěće 2009 kupiła. Wone pak fungowachu jeno z drobnymi pjenjezami. Nowe maja uniwerselnje wužiwajomne być. Po wčerawšim rozsudźe Hamorskeje gmejnskeje rady kupja najprjedy tři nowe awtomaty. Nastajić chcedźa je w Klětnjanskim přistawje, při Klětnjanskim wuhladnišću a na wulkim parkowanišću při Delnjowujězdźanskim pobrjoze jězora.
Tři awtomaty płaća dohromady něšto wjace hač 12 000 eurow. Tale suma je w lětušim dwójnym hospodarskim planje zapisana. Hišće do zahajenja lětušeje kupanskeje a wodosportoweje sezony chcedźa nastroje wobstarać. Wužiwać móža je wopytowarjo kaž dotal z drobnymi pjenjezami, ale tež z bankowej abo kreditnej kartu abo ze šmóratkom. Gmejna nadźija so z toho přidatnych parkowanskich dochodow.
