Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež za­jima­we stawizny. W swojej lětnjej seriji tajke gastronomiske předewzaća předstajamy, dźensa „Karstenowu piwowu stwičku“ w Pančicach-Kukowje. (16)

Njeposrědnje při mosće nad Klóšterskej wodu w Pančicach-Kukowje wabi napis hosćenca k pozastaću a přeradźa lačnemu a hłódnemu hosćej, zo rěka mějićel Karsten. Zo je jeho swójbne mjeno Natuš, pozdźišo tohorunja zhoniš. Dom, w kotrymž je dźensa „Karstenowa piwowa stwička“, bu 1802 natwarjeny. Abatisa klóštra Marijineje hwězdy Vizentia Marsch­ner bě tam něhdy prěnju šulu natwarić dała, na čož pokazujetej na domje wot dróhi derje widźomnej wulki swjaty křiž kaž tež wobnowjeny wopon klóštra. Po tym zo tu dźěći hač do lěta 1906 pod krutymi wuměnjenjemi wuwučowachu je Bruno Natuš, pradźěd nětčišeho mějićela, dom 1912 klóštrej wotkupił.