Chelno (BB/SN). Dotalne twarjenje wohnjoweje wobory w Chelnje móža klětu přetwarić. 89 lět stary dom budźe potom wjesne zetkawanišćo. Tajke dźě wobydlerjo hižo dlěši čas paruja. Minjeny štwórtk je sakski statny sekretar dr. Frank Pfeil Radworskej gmejnje přizwolenski spis spěchowanja přepodał.

Lěta 1932 běchu Chelnjenjo srjedź wsy dom za swoju wohnjowu woboru natwarili. Pozdźišo hišće mału kulturnu rumnosć přitwarichu. Dokelž pak stary depot zakonskim předpisam hižo njewotpowědowaše, su loni dospołnje nowy natwarili. Tak móža Chelnjanscy wobornicy – jich je 20 aktiwnych – swoju techniku nětko do moderneho twarjenja stajeć. Z něhdyšeje kulturneje rumnosće pak bu předrasćernja wobornikow, a tak wjesne towarstwa swoje zetkawanišćo zhubichu. Tónle brach so bórze zminje. Přetwar stareho twarjenja płaći něhdźe 231 000 eurow, znajmjeńša po dotalnych planach. Z toho přińdźe 75 procentow ze sakskeho programa „Witalne wjesne srjedźišća“, potajkim něhdźe 173 000 eurow.