Na wsy wobchod měć dźensniši dźeń wjace samozrozumliwe njeje. We wobłuku lětušeho lětnjeho seriala smy so na wsach rozhladowali, zo bychmy swojim čitarjam tón abo tamny wjesny wobchod předstajili.
Ze šwalču so stać bě přeco hižo són Veroniki Biele. Dźensa pak wot dźěła z jehličku a cwornom samym wjac žiwy być njemóžeš. Nimo toho je rodźena Žitawčanka jedna z poslednich swojeho stawa w Hornjej Łužicy. Jej pak so w Hodźiju woprawdźe derje dźe, a to dźakowano jeje wobchodźikej z mjenom „Verflixt und zugenäht“ na nawsy, kotryž wot lěta 2019 wjedźe. Tón je woprawdźita křinja dźiwow. W zadnim dźělu něhdźe 100 kwadratnych metrow wulkeho wobchoda ma knjeni Biele šwalčernju zarjadowanu. W prědnim dźělu předawarnje poskića wona wšitko, štož za wšědne zežiwjenje trjebaš.