Do zarjadniskeho zjednoćenstwa płaća Slepjanska, Dźěwinska a Trjebinska gmejna kóžde lěto pjenjezy za wobstaranje zarjadniskeho dźěła. Toho tež w přichodźe mjenje njebudźe.

Slepo (CK/SN). Kóžde lěto zaběra so zhromadny wuběrk Slepjanskeho zarjadniskeho zjednoćenstwa z prašenjom, kelko płaći zarjadnistwo za gmejny Slepo, Dźěwin a Trjebin. Prašenje steji stajnje potom na dnjowym porjedźe, hdyž dźe wo zwěsćenje noweho přinoška. Tón wučinja wot 1. januara 2022 na wobydlerja 194 eurow. To je zhromadny wuběrk na swojim zašłym posedźenju wobzamknył. Gremij wobsteji z třoch wjesnjanostow a z gmejnskich radźićelow ze wšěch třoch komunow.