Prěnjej měsacaj kóždeho lěta stej w Serbskim kulturnym centrumje ­Slepo stajnje jara měrnej. Tam pak hižo nětko na nalěćo mysla a přichodne wjetše zarjadowanja přihotuja.

Slepo (JoS/SN). Tele dny je w Slepjanskim Serbskim kulturnym centrumje (SKC) chětro ćicho. Hdyž woprawdźe raz wopytowar přińdźe, dyrbi so wón pola Sylwije Panošineje přizjewić. Šefowka domu wšak je stajnje na městnje. „Hač do kónca februara płaća hišće naše zymske wotewrjenske časy, po kotrychž mamy wot wutory do pjatka stajnje wot 10 do 16 hodź. wotewrjene. Hač do 20. februara je widźeć wustajeńca wo 30lětnym skutkowanju wušiwanskeho kružka.“