Na arealu Čornochołmčanskeho Krabatoweho młyna je minjene lěta wobstajnje něšto noweho nastawało. Tuchwilu přihotuja tam dalšu atrakciju, kotraž ma wopytowarjow bórze zawjeselić.

Čorny Chołmc (SiR/SN). Po nowej pjecy, kotruž mjeztym hižo pilnje wužiwaja, zwoprawdźeja w Čornochołmčanskim Krabatowym młynje nětko dalši projekt. Je to tak mjenowany kruh rapakow, wopřijacy šćežku, po kotrejž móžeš bosy chodźić a při tym wšelake podłohi z nohomaj začuwać. Wužłobjenja w zemi hižo na to pokazuja, hdźe pozdźišo wšelki material nasypaja. Kulojta forma a rozdźělenje do jednotliwych sektorow wotbłyšćuje formu młynskeho koła, takrjec wutrobu młyna, rozłožuje sobudźěłaćerka dožiwjenskeho zarjadnišća Magdalena Schaffer. Forma koła jewi so tež na dalšich městnach młyna, na přikład jako debjenka plestrowanja. Poprawnu ideju šćežki za bosychodźenje mějachu sobudźěłaćerjo Krabatoweho młyna sami. Tójšto impulsow za to pak dóstachu móhłrjec wotwonka. A su je wězo rady zapřijeli.