Chrósćicy (SN/MWj). Z wuznamjenjenjom Čestnohamtske zastojnstwo w februaru 2022 bu wčera Chróšćan Jurij Kokla wuznamjenjeny. Počesćenje přepodachu jemu krajny rada Michael Harig, wjesnjanosta Marko Kliman (wobaj CDU) a społnomócnjena za čestnohamtske dźěło we wokrjesu Dunja Reichelt.
Jurij Kokla je předsyda Chróšćanskeho sportoweho towarstwa, po ličbje čłonow najsylnišeho towarstwa gmejny. Z tym zwjazane je wjele organizatoriskich nadawkow, kotrež Chróšćan z wulkim angažementom čestnohamtsce zwoprawdźa, rěka w nowinskim zdźělenju krajnoradneho zarjada. W sportowym towarstwje wěnuja so nimo wolejbula tež lochkoatletice. W kopańcy hraje šěsć mustwow stajnje zaso sobu na prědnich městnach tabulkow. Prěnje mustwo muži hraje samo w krajnej klasy. Tež dźěło z dźěćimi a młodostnymi zabjerje w towarstwje wažne městno. Za wšo to je wjele čestnohamtskeho organizatoriskeho dźěła trěbne.
