Rowno (JoS/SN). Wjeselo so minjenu póndźelu a předwčerawšim žonam z mjezwoča směješe, zo je z pjerjodrěćom zaso zwučena towaršliwosć na Rownjanskim Njepilic statoku zaćahnyła. Před dobrymaj lětomaj bě pjerjodrěće poslednje zarjadowanje wobmjezowanjow korony dla. Tehdy nichtó njewědźeše, kak so wšitko wuwije. Nětko su swój slěd po-dawkow w běhu lěta móhłrjec zaso wožiwili. Nadźija, zo njebudźe to znowa poslednje zarjadowanje, je hladajo na připowědźenja z politiki woprawnjene.

Wjace hač 25 žonow bě na pjerjodrěće přišło, nic jeno z Rownoho, ale tež z tamnych wsow Slepjanskeje wosady. Někotre běchu so serbsku dźěłansku drastu woblekli. Zo bě jich dohromady telko wobdźělnicow, drje zaležeše sobu na tym, zo mějachu sej po tak dołhim času wjele wjesnych nowosćow powědać. Najstarša bě 90lětna Ema Kralowa. Tež wulki dźěl tamnych žonow so hižo tójšto lět na pjerjodrěću wobdźěla. Dokelž loni žane pjerjo drěli njeběchu, mějachu nětko ćim wjace na blidźe ležo.