Kulow (AK/SN). Módro-čerwjeno-běłe lipowe łopješko hnydom napadnje. „Tule serbšćinu dožiwiće“, steji na metalowej steli při Kulowskim Kolpingowym naměsće. Wona skedźbnja na serbske Bože mšě w farskej cyrkwi, na ptači kwas SLA w sportowni, na procesion na Bože ćěło, na křižerjow a mejemjetanje. „Z tym reagujemy na naprašowanja wopytowarjow. Wobstajnje so prašeja, hdźe móža w Kulowje serbšćinu dožiwić a słyšeć“, praji twarski nawoda města a społnomócnjeny za serbske naležnosće Stephen Rachel. „Tu bydlacych Serbow ma tafla pozbudźować, so k swojej maćeršćinje sylnišo wuznawać a ju rěčeć.“
Něhdźe 4 000 eurow je stela płaćiła. Financowało je ju město z tak mjenowaneje serbskeje komunalneje pawšale. QR-code skedźbnja na dalše serbske terminy na internetnej stronje města. „Tuchwilu někotre wobłuki našich internetnych stron do serbšćiny přełožujemy. Poněčim maja wšitke strony serbsce w syći być“, Rachel rozłožuje.