Wotrow (SN/MWj). Při wuhotowanju terena bywšeho hosćenca w Pančicach-Kukowje chce gmejna z architektom Markom Dźisławkom hromadźe dźěłać. Na swojim zašłym posedźenju we Wotrowskej starej šuli su gmejnscy radźićeljo z dwěmaj wzdatymaj hłosomaj přihłosowali, zo smě wjesnjanosta Markus Kreuz (CDU) wotpowědne architektne a honorarne zrěčenje podpisać.
Kaž Kreuz informowaše, su mjeztym próstwu wo spěchowanske srědki z programa za witalne wjesne srjedźišća zapodali. Z toho nadźijeja so 75 procentow spěchowanja. Hromadźe z dobytym mytom 100 000 eurow wubědźowanja Simul+ móhli tak něhdźe 440 000 eurow wudać. „To je maksimalna suma, kotruž změjemy w najlěpšim padźe k dispoziciji. Wjace njeńdźe“, Kreuz wuzběhny.