Sernjany (jb/SN). Wjesny swjedźeń w Sernjanach słuša mjeztym ke klasikarjam lěćnych swjedźenjow na serbskich wjeskach. Tón drje so jenož kóžde druhe lěto wotměje, za to pak so wjesnjenjo a hosćo ćim bóle na njón wjesela.
Hižo pjatk wječor zetkachu so wohnjowi wobornicy k wubědźowanju. Telko kaž hišće před lětami drje so tučasnje hižo njewobdźěla, dohromady pak přichwata pjeć cyłkow, zo bychu w hašenju mocy měrili. Najspěšniša wobora po dwěmaj přechodomaj bě Salowska, druhe městno wobsadźi Smjerdźečanska a bronzowu medalju wudoby sej domjacy team ze Sernjan-Róžanta. Wotrowčenjo a Pěskečenjo slědowaštej na městnomaj štyri a pjeć. Po mytowanju přizamkny so filmowy wječor při Klóšterskej wodźe. Tónraz pokazachu bayerski krimi z mjenom „Leberkäsjunkie“.