Pomnik za padnjenych Prěnjeje swětoweje wójny we Wulkich Zdźarach chcedźa ponowić
Wobmjetk so wot murje pušća. Wot dwurěčneho napisa „Unseren Gefallenen. Našim padnjenym“ je jenož mało widźeć. Ze stron cyrkwje widźane je napohlad pomnika za padnjenych Prěnjeje swětoweje wójny we Wulkich Ždźarach hišće hrozniši. Horni dźěl połkruha je runje tak rozpukany kaž nutřkowne murje. „Saněrowanje je nuznje trěbne. Jeli nětko njejednamy, so pomnik w originalnym stawje hižo restawrować njehodźi“, praji wjesny předstejićer a gmejnski radźićel Tilo Babick. Jeho zaměr je, pomnik ponowić a 2024 znowa poswjećić. Potom swjeća we Wulkich Zdźarach 650lětne wobstaće wsy.
