Wutwar syće w Slepom, Dźěwinje a Trjebinje derje pokročuje
Slepo/Dźěwin/Trjebin (AK/SN). Wutwar moderneje šěrokopasmoweje syće za spěšniši internet w Slepjanskej kónčinje dale derje pokročuje. To podšmórnychu wjesnjanosća gmejnow Slepo, Dźěwin a Trjebin w swojich gmejnskich nowinach. „Dźěła sewjernje železniskeje čary su zakónčene“, tak Slepjanski wjesnjanosta Jörg Funda (CDU). Hłubokotwarske dźěła w južnym dźělu Slepjanskeje gmejny tuchwilu dale zwoprawdźeja. Tam maja hišće hač do kónca awgusta dźěło. Po tym chce Telekom škleńčnonićowe kable do zemje zesuwać a přizamknyć.