Zarjadowarjo filmowych nocow w Krabatowym młynje spokojom

Čorny Chołmc (SN/MWj). Z wupředatym předstajenjom actionoweho filma „Top Gun Maverick“ ze 441 wopytowarjemi su so minjenu njedźelu lětuše fimowe nocy w Čornochołmčanskim Krabatowym młynje zakónčili. Na 19 předstajenjach móžachu wot 4. awgusta na dworje Krabatoweho młyna dohromady 6 300 wopytowarjow witać.

„Ličba wopytowarjow w tymle lěće je wjetša hač w našej premjernej sezonje 2019. Na to smy jara hordźi a směmy z prawom spokojom być. Wobhladujemy to jako mzdu za mnoho hodźin dźěła, kotrež je team, wobstejacy ze sobudźěłaćerjow filmowych nocow a čestnohamtskich pomocnikow Krabatoweho młyna, inwestował, zo by za wopytowarjow wulkotne zarjadowanje na nohi stajił“, praji projektowy nawoda filmowych nocow Manuel Unger.