Budyšin (CS/SN). Posedźenje Budyskeje měšćanskeje rady je wčera prěni raz nowowuzwoleny wyši měšćanosta Karsten Vogt (CDU) nawjedował. Jako so wón na swoje městno w prezidiju na žurli měšćanskeje rady posydny, wón rjekny: „Na stólcu sedźeć je to jedne, jón wupjelnić něšto druhe.“ Kak so wjelelětny šulski nawoda swojim nadawkam wěnuje, lubi nadźiju, zo so jemu to poradźi.

Prjedy pak hač so wón dnjowemu porjadej wěnowaše, su noweho wyšeho měšćanostu spřisahali a jemu 750 gramow ćežki hamtski rjećaz přepodali. Tónle nadawk přewza po słužbnych lětach najstarši měšćanski radźićel Heinrich Schleppers (CDU). Zo z Karstenom Vogtom w radnicy nowy wětřik zaćehnje, je hižo ryzy wonkownje na tym spóznać, zo bu parkowanska taflička za wyšeho měšćanostu při radnicy wotstronjena.