Prěni króć su projekt w Budyšinje při Sprjewi wotměli
Budyšin (CS/SN). Won z rjadowniskeje rumnosće a do přirody! To bě hesło, kotrež je šulerjow 8. a 9. lětnikow Serbskeje wyšeje šule a Melanchthonoweho gymnazija Budyšin njedawno na wosebity dźeń wabiło. Tući wužichu akciski dźeń rěkow a podachu so k Sprjewi, hdźež mějachu při Starej wodarni wšelake stacije zmištrować. Wone zmóžnichu šulerjam, sej mnohe nowe dopóznaća na temy wodźizna-ekologija, wobswětoškit a domjacy skót zdobyć.
„Dźeń rěkow“ je projekt sakskeho statneho ministerstwa za energiju, klimu, wobswět a ratarstwo kaž tež załožby za přirodu a wobswět. Do přewjedźenja projekta zapřijeći su krajne zarjadnistwo rěčnych zawěrow, krajny zarjad za wobswět, ratarstwo a geologiju kaž tež wobhospodarjenska towaršnosć za wobswět a ratarstwo. Dźeń rěkow je so mjeztym šesty króć, dotal po wjetšich městach, přewjedł, prěni króć pak w Budyšinje.