Budyšin (CS/SN). Wot měrca tutoho lěta nawjeduje Anna-Theres Pyka Budysku měšćansku biblioteku. 31lětna mać dweju małeju dźěsći bě hižo wot dźěćatstwa sem stajnje z knihami wobdata, přetož w domjacnosći jeje staršeju bě mnoho z nich. Jeje nan Christoph Pyka bě farar we Wósporku a hač do lońšeho we Wjelećinje. Hižo za čas dźěćatstwa we Wósporku wužiwaše Anna-Theres tamnišu jězbnu biblioteku. Po šulerskim praktikumje w Budyskej měšćanskej bibliotece bě za nju jasne, zo budźe jeje dalši powołanski puć z knihami zwjazany. Tuž poda so na wukubłanje na fachowu přistajenu za medijowe a informaciske słužby z fachowym směrom biblioteki a wotzamkny studij knihikupstwa a nakładnistwa. Po tym nastupi dźěło w Kamjeničanskej měšćanskej bibliotece. Jako bě městno nawodnicy biblioteki w Budyšinje wupisane, so wona požada a so wjeseleše, so na te wašnje zaso do domizny wróćić móc.