Njebjelčicy (AKR/SN). Po třoch lětach přestawki su karnewalisća Serbskopazličanskeho karnewaloweho towarstwa minjeny pjatk zaso ceptar w gmejnje přewzali. Z tym započa so w Njebjelčicach pjaty počas. Prěni króć dóstachu wot ­noweho wjesnjanosty Andréja Bulanka na gmejnje symboliski kluč zarjada a kasu přepodatej.

Dotal najdlěje amtěrowacy princowski por Marcel II. a Christina II. ze Zubneje skały dyrbješe sobotu wječor z ćežkej wutrobu regentstwo wotedać. Serbskopazličanske karnewalowe towarstwo bě na wólby noweho princa do „Bjesady“ přeprosyło. Na wupředatej žurli dožiwichu wopytowarjo rjany a wotměnjawy dwuhodźinski program. Prezident z krótkej narěču zabawny wječor wotewrě. Rjenje přihladować běše zaso škričkowej gardźe, kotraž ze zapalom zarejwa.