Wo aktualnym wuwiću sej we Wojerecach nazhonjenja wuměnili

Wojerecy (AK/SN). Město Wojerecy móže dźakowano spěchowanju ze stron zwjazkoweho programa „Demokratie leben!“ mnohostronske skutkowanje na tymle polu zesylnić. To je Mirko Pink, měšćanosta za šulu, kulturu a socialne minjeny pjatk na zazběhu schadźowanja „Ekstremizm“ podšmórnył. Wjace hač 40 zastupjerjow ze wšelakich towaršnostnych wobłukow so wobdźěli.

Wot oktobra je sobudźěłaćerka RAA Wojerecy Cindy Paulick koordinatorka města we wobłuku „partnerstwa za demokratiju“. Lětnje změja spěchowanje z mjenowaneho programa Zwjazka. „Srědki wotwołać komplikowane njeje. Tak móžemy runje tež mjeńše projekty – na přikład za šulske rjadownje, młodźinske kluby, towarstwa – direktnje a zaměrnje podpěrać“, rozłoži měšćanosta Pink.