Wojerecy (SN/MWj). Mjeztym zo maja we Wojerowskim starym měsće hižo 20 lět žiwy adwentny kalender, wuhotuja jón lětsa prěni raz tež na tamnym brjoze Čorneho Halštrowa, potajkim w Nowym měsće. Jedne z woknješkow wočini so sobotu, 17. decembra, we 18 hodź. w bydlenskim kompleksu 1 na Zusowej čo. 5. Wulka stwa prózdneho bydlenja změni so na tymle wječoru do serbskeje hodowneje stwy, kaž je snano něhdy mějachu, jako tu hišće chójny stejachu a Wojerecy běchu małe burske městačko. Na tónle čas chcedźa dopominać a we wupyšenym bydlenju serbske bajki čitać. Na kóncu wočakuja tohorunja Wojerowske dźěćatko.
„Wonkownje zda so to napřećiwk być, wšako je so z industrializaciju Wojerec serbske žiwjenje w dalokej měrje z města wutłóčiło“, rozłoži bywša zamołwita za serbske naležnosće města Gabriela Linakowa. Přiwšěm chcedźa takrjec serbsku zašłosć w dźensnišim žiwjenju wožiwić, a snano wšak so dźěćom serbske dźěćatko lěpje lubi hač rumpodich.