Kulow. Rjanu dohodownu tradiciju pěstuja mjeztym hižo 16 lět na Kulowskej wyšej šuli „Korla Awgust Kocor“. Posledni dźeń do kónclětnych prózdnin so šulerki a šulerjo zetkaja a zhromadnje adwentne a hodowne spěwy spěwaja. K tomu sej tohorunja holcy a hólcow Kulowskeje zakładneje šule přeproša. Po tym zo je so w zašłosći hodowne spěwanje tež hižo w sportowni wotměło, móžachu tónle podawk wčerawšu srjedu zaso w katolskej farskej cyrkwi přewjesć.
Runja zašłym lětam bě hudźbna wučerka wyšeje šule Uta König ze šulerskej kapału a mnohimi dalšimi chowancami wšelake hudźbne přinoški nazwučowała. Tak bě tónle dohodowny podawk zaso jara hnujace zarjadowanje, na kotrymž šulerjo kaž tež jich wučerjo swoje spěwne kmanosće dopokazachu. Wosebity wokomik drje bě, jako Rosa Kochta z přewodom Uty König němski kěrluš „Maria durch ein Dornwald ging“ zaspěwa. To drje někotremužkuli připosłucharjej po chribjeće huškaše. Po něhdźe hodźinje wšitcy farsku cyrkej w prawje dohodownej atmosferje wopušćichu a so hižo nětko na klětuše zhromadne spěwanje wjesela.
