Posledni dźeń šule w cyrkwi zhromadnje spěwali

štwórtk, 22. decembera 2022
artikl hódnoćić
(0 )
Šulerjo Kulowskeje wyšeje šule su so wčera k dohodownemu spěwanju w tamnišej katolskej cyrkwi zetkali.  Foto: Kerstin Streit Šulerjo Kulowskeje wyšeje šule su so wčera k dohodownemu spěwanju w tamnišej katolskej cyrkwi zetkali. Foto: Kerstin Streit

Kulow. Rjanu dohodownu tradiciju pěstuja mjeztym hižo 16 lět na Kulowskej wyšej šuli „Korla Awgust Kocor“. Posledni dźeń do kónclětnych prózdnin so šulerki a šulerjo zetkaja a zhromadnje adwent­ne a hodowne spěwy spěwaja. K tomu sej tohorunja holcy a hólcow Kulowskeje­ zakładneje šule přeproša. Po tym­ zo je so w zašłosći hodowne spěwanje tež hižo w sportowni wotměło, móžachu tónle podawk wčerawšu srje­du zaso w katolskej farskej cyrkwi přewjesć.

Runja zašłym lětam bě hudźbna wučerka wyšeje šule Uta König ze šulerskej kapału a mnohimi dalšimi chowancami wšelake hudźbne přinoški nazwučowała. Tak bě tónle dohodowny podawk zaso jara­ hnujace zarjadowanje, na kotrymž šulerjo kaž tež jich wučerjo swoje spěwne kmanosće dopokazachu. Wosebity wokomik drje bě, jako Rosa Kochta z pře­wodom Uty König němski kěrluš „Maria durch ein Dornwald ging“ zaspěwa. To drje někotremužkuli připosłucharjej po chribjeće huškaše. Po něhdźe hodźinje wšitcy farsku cyrkej w prawje dohodownej atmosferje wopušćichu a so hižo nětko na klětuše zhromadne spěwanje wjesela.

wozjewjene w: Lokalka
Prošu přizjewće so, chceće-li komentar podać

słowo lěta 2022

nawěšk

nowostki LND