W Delanach loni dobre zakłady za lětuše předewzaća połožili

Róžant (JK/SN). Spokojom a dźakowny zhladuje wjesnjanosta gmejny Ralbicy-Róžant Hubertus Ryćer (CDU) na minjene lěto. W gmejnje zmištrowachu dalši wulki krok k zwoprawdźenju najwažnišeho projekta komuny – nowotwara Ralbičanskeje pěstowarnje a přetwara tučasneje pěstowarnje na hort. Za to je krótko do kónca lěta přišło přizwolenje a wobkrućenje financowanja a spěchowanja. Lětsa steja dalše zarjadniske nadawki jako doskónčny přihot nowotwara na planje. Te spočatk noweho lěta wotdźěłaja a sej ze zamołwitymi zarjadami wothłosuja, zo bychu za symboliski prěni zaryw lětsa wšitko derje přihotowane měli.