Dźensa je po tradiciji za wjetšinu ukrainskich ćěkancow prěni dźeń hód

Budyšin/Kijew (SN/MiP). Prawosławni křesćenjo swjeća hody po wosebitej – julianskej – protyce, přetož wjetšina prawosławnych cyrkwjow njebě gregorianiski kalender připóznała, kotryž bě bamž Gregor XIII. w lěće 1582 zawjedł. Tuchwilu padnjetej 24. a 25. december julianskeje protyki na 6. a 7. januar gregorianskeho ličenja. Po Putinowej aneksiji połkupy Krim w lěće 2014 pak je so ukrainske wjednistwo prawosławneje cyrkwje 2018 rozsudźiło, so wot ruskeje cyrkwje, kotrejež dotal přisłušeše, wotpačić. Hladajo na to, zo je ruska prawosławna cyrkej wójnu Putina wot wšeho spočatka jasnje podpěrowała, běše tale kročel njewobeńdźomna. Móhłrjec jako widźomne znamjo je ukrainska prawosławna cyrkej loni wobzamknyła, swjedźeń hód na datum gregorianskeje – potajkim našeje – protyki přepołožić.