Wobydlerjo w Hrańcy jednohłósnje peticiju podpěraja
Hrańca/Róžant (JK/SN). W Hrańcy steji rjana nowa busowa čakarnja při statnej dróze S 101 mjez Ralbicami a Chrósćicami. Busy pak ju ignoruja, hižo před njej wotboča a jědu přez wjes Hrańcu dale do směra na Haty, Nowu Wjesku hač do Worklec. W napřećiwnym směrje je runje tak. Cyłkownje 20 busow so na tute wašnje přez mału wjes dračuje a načini wobydlerjam njeměr a njewěstosć.
