Wulki plan: Hotel při jězoru

štwórtk, 16. februara 2023
artikl hódnoćić
(0 )

Hamor (AK/SN). Južnje a zapadnje turistiskeje informacije při Hamorskim po­brjohu Bjerwałdskeho jězora ma hotel z wólnočasnej připrawu nastać. Inwestor je předewzaće Elldus Resort z Oberwiesenthala. Jeho jednaćel Jens Ellinger je swoje plany na zašłym posedźenju ­Hamorskeje gmejnskeje rady předstajił. W nalěću 2024 chcedźa twarić započeć, w lěću 2026 ma wšitko hotowe być. Předani něhdźe pjeć hektarow wulkeje ležownosće za 425 000 eurow su gmejnscy radźićeljo přihłosowali.

Kaž Jens Ellinger rozłoži, ma 60 apartmentow kaž tež 20 dwójnych stwow z dohromady 310 łožemi nastać. Dale planuja wellnessowy wobłuk, dwaj hosćencaj z cyłkownje 380 městnami, wobłuk za hrajkanje zdźěla pod třěchu, připrawu za minigolf z 18 dźěrkami kaž tež fitnesowe a seminarne rumnosće. Nowosć w Sakskej drje budźe parcours za třělenje z prokom a kłokom ze 24 čarami. Předewšěm měri so Elldus Resort Bjerwałdski jězor na swójby z dźěćimi w předšulskej a zakładnošulskej starobje. Runje tak pak chcedźa wukonowych a wólnočasnych sportowcow narěčeć.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND