„1 000 štomow za Budyšin“ rěka projekt, za kotryž Iniciatiwa Zazelenjero města – Die Stadtbegrüner hišće hač do kónca februara pjenjezy z tak mjeno­wanej crowdfunding-kampanju zběra. W tym zwisku wuhotuje mjez druhim informaciske a kulturne zarjadowanja, kaž na přikład filmowy wječor předwčerawšim w Kamjentnym domje.

Budyšin (SN/bn). Dokumentarny film „Und es geht doch ... – Agrarwende jetzt!“ portretuje stawizny a skutkowanje Burskeho zjednoćenstwa producentow Schwäbisch-Hall, kotremuž mjeztym něhdźe 1 400 přewažnje mjeńšich ratarskich zawodow w Němskej přisłuša. Režiser Bertram Verhaag chce z paskom pokazać, zo hodźa so hesła „regionalnosć, ekologija a ekonomija“ takrjec pod jedyn kłobuk, ćehnje-li dosć ludźi za jednym postronkom. Nimo toho je film pledoyer za zakónčenje „faktisce nadal kolonialneho wuklukowanja ratarjow w třećim swěće“.