Pod titlom „Gregorius Mättig a potajnstwo njesmjertnosće“ je wosebite wudaće rjada Mosaik wušło. Zešiwk móža sej nětko tež wopytowarjo sprjewineho města sobu domoj wzać.

Budyšin (SN). W Budyskej turistiskej informaciji pódla tudyšeje radnicy maja wot dźensnišeho wosebite wudaće Mosaika z titlom „Gregorius Mättig a potajnstwo njesmjertnosće“ w poskitku. „Wjeselimy so, zo je zešiwk za mały dar wotnětka tež na druhim městnje w Budyšinje w poskitku“, praji dr. Uwe Koch, předsyda rady Załožby dr. Gregoriusa Mättiga. Dyrdomdej Abraxa, Brabaxa a Califaxa po Budyskich stawiznach je w Budyskim tachantskim wobchodźe dotal jara wulki wothłós nadešoł.