Budyšin (CS/SN). „Kniha ma za křesćanstwo jara wulki wuznam“, rjekny Budyski financny měšćanosta dr. Robert Böhmer, jako wón předwčerawšim Křesćanskej kniharni na Mjasowych wikach k 25lětnemu wobstaću gratulowaše. Nic bjez přičiny je wjele swjatych z knihu w ruce zwobraznjenych. W času wot załoženja kniharnje hač do dźensnišeho je so wjele změniło, na přikład elektroniske medije. Zwostało pak je, zo chce wulki dźěl čitarjow woprawdźitu knihu w ruce měć. Böhmer tuž nawodnicy Katrin Otto a jeje čestnohamtskim sobuwojowarjam přeješe, zo bychu stajnje zajimowanych čitarjow měli.

Mjez gratulantami běštaj Matthias Weber a Markus Koch, jednaćel a prokurist Křesćanskeje kniharnje tzwr w Dillenburgu. Tam su wosebite kniharnje 1980 do žiwjenja zwołali. Mjeztym eksistuje tajkich po wšej Němskej 29. Z nich je Budyska najwuchodniša. Jako wosebitosć Matthias Weber wuzběhny, zo su 1998 při załoženju Budyskeje kniharnje přeprošenje tež serbsce w Serbskich Nowinach wozjewili. Eksemplar tehdyšeje nowiny měješe Weber samo sobu.