Po zwučenym wašnju nastaji so jutrowničku dźewjeć serbskich křižerskich procesionow na puć do susodneje wosady, zo bychu poselstwo wo Zrowastanjenym wozjewili. Runje tak z wašnjom je, zo podawamy do toho přehlad wo zajimawosćach procesionow. Te su nam jich kantorojo a nawodźa sposrědkowali. Dalokož su nam znate, wozjewjamy tež mjena jubilarow a nowačkow.

Z něhdźe 60 křižerjemi poda so Budyski křižerski procesion lětsa na puć. Po informacijach kantora Bosćija Čórlicha je to 30. raz po wozrodźenju procesiona, zo pojěchaja do Radworja. Tónle mały jubilej bychu hižo loni měć dyrbjeli. Korony dla pak jónu jěchać njemóžachu. Jubilarow mjez Budyskimi žanych njezměja, za to pak třoch nowačkow. Mału změnu wuhladamy na čole procesiona. Dwójce je Tomaš Lukaš jednu z chorhojow njesł. Njedźelu přewozmje Marko Wićaz tele zastojnstwo wot njeho. Tamny chorhojnik budźe André Wowčerk.